കൊച്ചിയില്‍ പുഴയിലെ മണല്‍ക്കുഴിയില്‍പ്പെട്ടവരെ രക്ഷിക്കുന്നതിനിടെ യുവാവ് മുങ്ങി മരിച്ചു. എരൂര്‍ കല്ലുപറമ്പില്‍ കെഎം മനേഷ് (42) ആണ് മരിച്ചത്.

ബലി തര്‍പ്പണ ചടങ്ങുകള്‍ക്കിടെയാണ് അപകടം നടന്നത്. പാഴൂര്‍ മണല്‍പ്പുറത്തിനു സമീപമുള്ള കടവില്‍ ഇന്നലെ രാവിലെ 10.30ഓടെയാണ് സംഭവമുണ്ടായത്.

മനേഷിന്റെ മാതൃസഹോദരന്റെ ബലി തര്‍പ്പണത്തിനായി 20അംഗ സംഘമാണ് പാഴൂരില്‍ എത്തിയത്. മണല്‍പ്പുറത്തിനു സമീപത്തായി പുഴയോരത്തു മണ്‍ത്തിട്ടയില്‍ നിന്ന അമല്‍, സജിന്‍, സൂര്യദേവ് എന്നിവര്‍ കാല്‍വഴുതി വെള്ളത്തില്‍ വീണു. നീന്തലറിയുമായിരുന്ന മനേഷ് മൂന്ന് പേരെയും രക്ഷിച്ച് കരയില്‍ എത്തിക്കുകയും ചെയ്തു.

പിന്നാലെ മനേഷ് മണല്‍ വാരല്‍ നടന്ന കുഴിയില്‍ മുങ്ങിപ്പോകുകയായിരുന്നു. പുഴയുടെ പല ഭാഗങ്ങളിലായി ഇത്തരം കുഴികളുണ്ട്. ഒപ്പമുണ്ടായിരുന്നവരും നീന്തല്‍ പരിശീലനം നടത്തിയിരുന്നവരും ചേര്‍ന്നു കരയിലെത്തിച്ചു.

പിന്നീട് ജെഎംപി ആശുപത്രിയില്‍ എത്തിച്ചെങ്കിലും ജീവന്‍ നഷ്ടമായി. ആദ്യം വെള്ളത്തില്‍ വീണ മൂന്ന് പേര്‍ക്കു ആരക്കുന്നം എപി വര്‍ക്കി മിഷന്‍ ആശുപത്രിയില്‍ പ്രഥമ ചികിത്സ നല്‍കി. മനേഷ് ഇലക്ട്രീഷ്യനാണ്. ഭാര്യയും രണ്ട് മക്കളുമുണ്ട്.