എലത്തൂര് ട്രെയിന് തീവയ്പ്പു കേസിലെ പ്രതി ഷാറൂഖ് സെയ്ഫിയുടെ തിരിച്ചറിയല് പരേഡ് നടത്തി... കേസിലെ സാക്ഷികളെ ഉള്പ്പെടെ കോഴിക്കോട് പൊലീസ് ക്യാംപിലെത്തിച്ചായിരുന്നു തിരിച്ചറിയല് പരേഡ്
എലത്തൂര് ട്രെയിന് തീവയ്പ്പു കേസിലെ പ്രതി ഷാറൂഖ് സെയ്ഫിയുടെ തിരിച്ചറിയല് പരേഡ് നടത്തി. ഇതിനായി എഡിജിപി എം.ആര്. അജിത് കുമാറും ഐജി നീരജ് കുമാര് ഗുപ്തയും പൊലീസ് ക്യാംപിലെത്തി.
കേസിലെ സാക്ഷികളില് നിന്ന് പ്രത്യേക അന്വേഷണ സംഘം ഇന്നലെ മൊഴി രേഖപ്പെടുത്തിയിരുന്നു. അതിനിടെ, ഷാറുഖ് സെയ്ഫിക്കു കോയമ്പത്തൂര് കാര് സ്ഫോടനവുമായി ബന്ധമുണ്ടോയെന്ന കാര്യം അന്വേഷിക്കുന്നതായി സിറ്റി പൊലീസ് കമ്മിഷണര് വി.ബാലകൃഷ്ണന് വെളിപ്പെടുത്തി.. ഷാറുഖ് സെയ്ഫി ട്രെയിനില് ആക്രമണം നടത്താനായി പുറത്തുനിന്നുള്ളവരുടെ സഹായം ലഭിച്ചെന്ന സംശയം ബലപ്പെടുത്തുന്ന തെളിവുകള് പൊലീസിന് ലഭിച്ചിട്ടുണ്ട്.
ആക്രമണ സമയത്തു ധരിച്ച വസ്ത്രമല്ല കണ്ണൂര് റെയില്വേ സ്റ്റേഷനിലെത്തിയപ്പോള് പ്രതി ധരിച്ചിരുന്നതെന്നു തെളിയിക്കുന്ന സിസിടിവി ദൃശ്യമാണ് അന്വേഷണ സംഘത്തിനു ലഭിച്ചത്.
ആക്രമണത്തിനു പിന്നാലെ ബാഗ് റെയില്വേ ട്രാക്കില് നഷ്ടപ്പെട്ടിട്ടും പ്രതിക്ക് എവിടെ നിന്നാണു മറ്റൊരു വസ്ത്രം ലഭിച്ചതെന്നു വ്യക്തമല്ല. ട്രെയിനില് ആക്രമണം നടത്തിയ ശേഷം രക്ഷപ്പെടാനായി പ്രതിയെ സഹായിച്ചത് ആരെന്നു കണ്ടെത്താനുള്ള ശ്രമത്തിലാണ് അന്വേഷണ സംഘം.
അതേസമയം പ്രതിയുടെ തീവ്രവാദ ബന്ധം ഉറപ്പിച്ചാല് കേസ് മറ്റൊരു തലത്തിലേക്കു നീങ്ങും. കോയമ്പത്തൂര്, മംഗലാപുരം സ്ഫോടനങ്ങള്ക്കും ട്രെയിന് ആക്രമണത്തിനും സമാനതകള് കണ്ടെത്തി്. ഈ സാഹചര്യത്തിലാണ് അന്വേഷണം തമിഴ്നാട്ടിലേക്കും നീളുന്നത്.
"
https://www.facebook.com/Malayalivartha