മൂന്നാറിൽ വെച്ച് നടന്ന വന സൗഹൃദ സദസ്സ് പരിപാടിയുടെ നോട്ടീസിൽ‌ തന്റെ പേര് ഉൾപ്പെടുത്താത്തതിനെ വിമർശിച്ച് മുൻമന്ത്രിയും എംഎൽഎയുമായ എംഎം മണി. ഈ പരിപാടിയിൽ പ്രസം​ഗിക്കുമ്പോൾ തന്നെയാണ് എംഎം മണി സംഭവത്തെക്കുറിച്ച് സൂചിപ്പിച്ചത്. വനംവകുപ്പ് ഉദ്യോഗസ്ഥർ മനപ്പൂർവ്വം തന്റെ പേര് നോട്ടീസിൽ നിന്ന് ഒഴിവാക്കിയതാണെന്നായിരുന്നു എംഎം മണി പറഞ്ഞത്. വനംവകുപ്പ് മന്ത്രി എ.കെ ശശീന്ദ്രൻ വേദിയിലിരിക്കെയായിരുന്നു അദ്ദേഹത്തിന്റെ വിമർശനം.തന്നെ വിളിച്ചില്ലെങ്കിലും പറയാനുള്ള കാര്യങ്ങൾ പത്ര സമ്മേളനം നടത്തിപ്പറയും. നല്ല ഭാഷയും വരും. ഒരു കാര്യം പറയാം. മര്യാദയ്ക്കാണെങ്കിൽ മര്യാദയ്ക്ക്. അല്ലെങ്കിൽ നാട്ടുകാർ ചുമ്മാ മര്യാദകേട് കാണിക്കും. എന്നെ ഈ നോട്ടീസിൽ നിന്ന് ഒഴിവാക്കിയത് കൊണ്ടൊന്നും ഞാൻ ഒഴിവാവില്ല. ഞാൻ ഈ നാട്ടുകാരുടെ കൂടെ ഇവിടെ കാണും. മനസ്സിലാക്കിക്കോളൂ..

ഇതിനകത്ത് ഞാൻ അങ്ങനെ ഒഴിവാക്കാവുന്ന ആളാണോ..ഞാൻ മന്ത്രിയായിരുന്ന ആളല്ലേ..ഞാൻ ഇപ്പോൾ എംഎൽഎയല്ലേ.. പിന്നെ എന്താ. അതൊക്കെ ഒരുമാതിരി പണിയാ ഞങ്ങളുടെ എടുത്ത് എടുക്കേണ്ട.. എംഎം മണി പറഞ്ഞു. താൻ മന്ത്രി വിളിച്ചത് കൊണ്ട് മാത്രമാണ് പരിപാടിക്ക് വന്നതെന്നും അദ്ദേഹം പറഞ്ഞു.ഇവിടുത്തെ മുഴുവൻ കുഴപ്പങ്ങളും ഉണ്ടാക്കുന്നത് ഉദ്യോ​ഗസ്ഥരാണെന്നാണ് തന്റെ അഭിപ്രായമെന്നും ബഹുമാനപ്പെട്ട മന്ത്രി ആത്മവിശ്വാസമുണ്ടാക്കുന്ന നിലയിൽ കാര്യങ്ങൾ പറഞ്ഞതിൽസന്തോഷം ഉണ്ടെന്നും അതിന് അദ്ദേഹത്തോട് നന്ദി രേഖപ്പെടുത്തുന്നു എന്നും മണി വ്യക്തമാക്കി. അരിക്കൊമ്പൻ വിഷയത്തിൽ സുപ്രീം കോടതിയിൽ പോയത് ഹൈക്കോടതി ഉത്തരവിന് ബലം നൽകി എന്നും ഇത് തന്നെ ആയിരുന്നു വനം വകുപ്പ് ഉദ്യോഗസ്ഥരുടെ ലക്ഷ്യം എന്നും മണി വിAമർശിച്ചു.ഈ വിഷയത്തിൽ‌ താനെടുത്ത നിലപാട് കാരണം ഉദ്യോ​ഗസ്ഥർക്ക് തന്നോട് പകയാണെന്നും മണി ആരോപിച്ചു. അതുകൊണ്ടാണ് തന്റെ പേര് നോട്ടീസിൽ വെയ്ക്കാത്തതെന്നും എംഎൽഎ ആരോപിച്ചു. അതേസമയം, എം എം മണിയുടെ പേര് നോട്ടീസിൽ ഉൾപ്പെടുത്താതിരുന്നത് പരിശോധിക്കും എന്ന് വനം വകുപ്പ് മന്ത്രി എ. കെ ശശീന്ദ്രൻ പറഞ്ഞു

യോഗത്തിൽ അധ്യക്ഷൻ ആകാനുള്ള യോഗ്യത എംഎം മണിക്ക് ഉണ്ടായിരുന്നു. ഉദ്യോഗസ്ഥർക്ക് തെറ്റിദ്ധാരണ സംഭവിച്ചത് ആകാം എന്നും മന്ത്രി പറഞ്ഞു.അരിക്കൊമ്പൻ വിഷയത്തിൽ താന്റെ നിലപാട് സുഖിക്കാതത്ത ഉദ്യോഗസ്ഥർ പകപോക്കുന്നതിന്റെ ഭാഗമായാണ് തന്നോട് കാണി്കുന്ന അവഗണനയെന്നും എം.എം മണി പറഞ്ഞു. ആരും തന്റെ വായ മൂടികെട്ടാൻ നോക്കണ്ട എന്നും മണി പറഞ്ഞു.ദേവികുളത്ത് നിലവിൽ എംഎൽഎ ഇല്ലാത്തതിനാലാണ് മറ്റു ജനപ്രതിനിധികളെ അദ്ധ്യക്ഷ സ്ഥാനത്തേക്ക് പരിഗണിച്ചത്. ഇതും എം.എം മണിയെ ചൊടുപ്പിച്ചു. എം.എൽ.എ ഉള്ളപ്പോൾ മറ്റൊരാളെ ആദ്ധ്യക്ഷനാക്കിയതെന്തിനെന്നും താൻ ഒരു മന്ത്രിയായിരുന്നു എന്നും വേദിയെ എം.എം മണി ഓർമിപ്പിച്ചു. എം.എം മണിയുടെ പരാതി പരിശോധിക്കുമെന്നും ഉദ്യോഗസ്ഥരുടെ അശ്രദ്ധ മൂലമാണ് നോട്ടീസിൽ പേര് ഉൾപ്പെടുത്താൻ വിട്ടുപോയതെന്നും മന്ത്രി പറഞ്ഞു.