കോളേജ് യുയുസി വിവാദം... രൂക്ഷ വിമര്ശനവുമായി ഗവര്ണര് ആരിഫ് മുഹമ്മദ് ഖാന്
കാട്ടാക്കട ക്രിസ്ത്യന് കോളേജ് യുയുസി വിവാദത്തില് രൂക്ഷ വിമര്ശനവുമായി സംസ്ഥാന ഗവര്ണര് ആരിഫ് മുഹമ്മദ് ഖാന്. വിഷയം പരിശോധിക്കുമെന്ന് പറഞ്ഞ അദ്ദേഹം ഇങ്ങനെയൊക്കെയാണോ ജനാധിപത്യത്തെ കുറിച്ച് കുട്ടികളെ പഠിപ്പിക്കേണ്ടതെന്നും ചോദിച്ചു. യുവതലമുറക്ക് നല്കേണ്ട സന്ദേശം ഇതല്ലെന്നും അദ്ദേഹം പറഞ്ഞു. വിസി നിയമന വിവാദത്തില് അഞ്ച് തവണ യൂണിവേഴ്സിറ്റികളെ ഓര്മിപ്പിച്ചുവെന്ന് പറഞ്ഞ ചാന്സലര് ബന്ധപ്പെട്ടവര് നടപടിയെടുക്കണമെന്നും ചാന്സലര് എന്ന നിലയില് ചെയ്യേണ്ടത് ചെയ്തുവെന്നും പറഞ്ഞു.
ക്രിസ്ത്യന് കോളേജിലെ യുയുസി ആള്മാറാട്ട കേസില് ബന്ധപ്പെട്ട് കെഎസ്യു പരാതി നല്കി. മന്ത്രി വി. ശിവന്കുട്ടി, എംഎല്എ ജി. സ്റ്റീഫന്, കോളേജ് പ്രിന്സിപ്പള് ജി.ഐ ഷൈജു, എസ്എഫ്ഐ നേതാവ് വിശാഖ് എന്നിവര് ഗൂഢാലോചന നടത്തിയെന്നും സംഭവത്തിലെ അഴിമതിയും ആള്മാറാട്ടവും പരിശോധിക്കണമെന്നും ആവശ്യപ്പെട്ട് സംസ്ഥാന വിജിലന്സ് ഡയറക്ടര്ക്കാണ് പരാതി നല്കിയിരിക്കുന്നത്.
യുയുസിയായി മത്സരിച്ച് ജയിച്ച അനഘ രാജിവെച്ചത് കൊണ്ടാണ് വിശാഖിന്റെ പേര് നല്കിയതെന്നാണ് പ്രിന്സിപ്പലിന്റെ വാദം. അനഘയുടെ രാജിക്കത്തും പ്രിന്സിപ്പല് ഹാജരാക്കി. വിശാഖ് തെരഞ്ഞെടുപ്പില് ജയിച്ചിരുന്നില്ലെന്നും ജയിച്ചത് അനഘയും ആരോമലുമാണെന്നും റിട്ടേണിങ് ഓഫീസര് കേരള സര്വകലാശാലയ്ക്ക് റിപ്പോര്ട്ട് നല്കി. അനഘയ്ക്ക് പകരം വിശാഖിന്റെ പേര് ചേര്ത്തത്തില് വ്യക്തത വരുത്താന് പ്രിന്സിപ്പലിന് ഇനിയും സാധിച്ചില്ല.
അതിനിടെ സംഭവത്തില് എ.വിശാഖിനെതിരെ സിപിഎം നടപടിയെടുത്തു. സിപിഎം പ്ലാവൂര് ലോക്കല് കമ്മിറ്റി അംഗമായ വിശാഖിനെ പാര്ട്ടിയില് നിന്നും സസ്പെന്ഡ് ചെയ്തു. തിരുവനന്തപുരം ജില്ലാ സെക്രട്ടറിയേറ്റിന്റെ നിര്ദ്ദേശ പ്രകാരമാണ് നടപടി. തെരഞ്ഞെടുപ്പില് മത്സരിക്കാത്ത വിശാഖിന്റെ പേര് മത്സരിച്ച് ജയിച്ച യുയുസി അനഘയുടെ പേര് മാറ്റി ഉള്പ്പെടുത്തിയതിലാണ് നടപടി. വിശാഖിന്റെ ഭാഗത്തുനിന്നും ഗുരുതര വീഴ്ചയുണ്ടായെന്നാണ് പാര്ട്ടി വിലയിരുത്തല്. എസ്എഫ്ഐ കാട്ടാക്കട ഏരിയാ കമ്മിറ്റി അംഗമായ വിശാഖിനെ ഇന്നലെ തെരഞ്ഞെടുക്കപ്പെട്ട എല്ലാ സ്ഥാനങ്ങളില് നിന്നും എസ്എഫ്ഐ മാറ്റിയിരുന്നു.
https://www.facebook.com/Malayalivartha
