ചിന്നക്കനാലിൽ ഭീതി പടർത്തിയ അരിക്കൊമ്പനെ കേരളം കാടുകടത്തിയെങ്കിലും ആന ഇപ്പോൾ തമിഴ്നാട്ടിൽ ശല്യക്കാരനായിരിക്കുകയാണ്. മയക്കുവെടി വച്ച് ആനയെ പിടികൂടുവാൻ തമിഴ്നാട്ടിൽ ദൗത്യ സംഘം ഇറങ്ങി കഴിഞ്ഞിരിക്കുന്നു. ഈ അവസരത്തിൽ അരിക്കൊമ്പനുമായി ബന്ധപ്പെട്ട് നടനും എംഎൽഎയുമായ കെ ബി ഗണേഷ് കുമാർ പറഞ്ഞ വാക്കുകളാണ് ചർച്ചയാകുന്നത്.

അരിക്കൊമ്പനെ പിടികൂടി കുങ്കിയാനയാക്കുകയല്ലാതെ വേറെ മാർഗമില്ലെന്ന് കെ ബി ഗണേശ് കുമാർ പറഞ്ഞു. എവിടെ കൊണ്ടു പോയി പാർപ്പിച്ചാലും അരിക്കൊമ്പൻ തിരിച്ചു വരുമെന്നും നാട്ടിലെ ആളുകളെ അതിന് ഭയമില്ലെന്നും കെ.ബി,​ ഗണേഷ് കുമാർ എം.എൽ.എ വ്യക്തമാക്കി. ഉത്സവത്തിന് കൊണ്ടുവരുന്ന ആനയ്ക്ക് ഒരു പഴം മേടിച്ച് കൊടുക്കാത്ത ആളുകളാണ് ഇതിനെതിരെ കേസ് കൊടുക്കുന്നത്.

ഈയിടെ വനം വകുപ്പ് ഉദ്യോഗസ്ഥരുമായി നടന്ന ഉന്നതതല യോഗത്തിൽ ഞാൻ പറഞ്ഞിരുന്നു നിങ്ങളുടെ അഞ്ചു ലക്ഷം രൂപയുടെ കോളർ തമിഴ്നാട് സർക്കാർ കൊണ്ടുപോകുമെന്ന്. മിക്കവാറും അത് സംഭവിക്കും. ആനയ്ക്ക് വഴി മനസ്സിലായി. ‘ഞാൻ ജനിച്ചപ്പോൾ തൊട്ട് ആനയെ കാണുന്ന ഒരാളാണ്. അതിനെ സ്നേഹിക്കുകയും അതിന്റെ മനശാസ്ത്രം അറിയുകയും ചെയ്യാം.

ആനത്താരയിൽ ആളുകൾ താമസിക്കുന്നു എന്നൊക്കെ പറയുന്നത് പാവപ്പെട്ട കർഷകരെ ദ്രോഹിക്കുന്ന പ്രസ്താവനയാണ്. അങ്ങനെ ആണെങ്കിൽ കമ്പത്ത് തമാസിക്കുന്ന ആളുകളൊക്കെ ആനത്താരയിൽ താമസിക്കുന്നവരാണോ?​ ആനയ്ക്ക് ഇഷ്ടമുള്ള ഭക്ഷണത്തിന്റെ മണം പിടിച്ചു കഴിഞ്ഞാൽ അത് തേടി വരും. ഈ ആനയ്ക്ക് മനുഷ്യന്റെയും അരിയുടെയും മണം അറിയാം.

ആദ്യം തേയില തോട്ടത്തിലിറങ്ങി,​ പിന്നെ അരി അന്വേഷിച്ചു വന്നു. ഇപ്പോൾ നാട്ടിലും ഇറങ്ങി. അതിന് നാട്ടിലെ ആളുകളെ ഒട്ടും തന്നെ ഭയമില്ല. ആവശ്യമില്ലാത്ത കാര്യത്തിൽ നമ്മൾ ഇടപെടരുത്. തമിഴ്‌നാടിന് അതിനെ പിടിക്കുകയല്ലാതെ വേറെ മാർ‌ഗമില്ല,​ ഇതിനെ എവിടെക്കൊണ്ടു വിട്ടാലും പുറത്തു വന്നുകൊണ്ടിരിക്കും.​ എത്രയും വേഗം മെരുക്കി കുങ്കി ആനയാക്കുക മാത്രമാണ് ഇനിയുള്ള ഏക പോംവഴിയെന്ന് ഗണേഷ് കുമാർ പറഞ്ഞു.

“ഓരോ ആനയ്ക്കും ഓരോ സ്വഭാവമുണ്ട്. ആവശ്യമില്ലാത്ത കാര്യത്തിൽ നമ്മൾ ഇടപെടരുത്. തമിഴ്നാട്ടിൽ മനുഷ്യജീവന് ഇവിടുത്തേക്കാൾ വിലയുണ്ടെന്നാണ് ഞാൻ മനസ്സിലാക്കുന്നത്. മിക്കവാറും ഇന്നു തന്നെ പിടിച്ചുകൊണ്ടുപോകും. ഇടത്തേക്കാലിലെ മന്ത് എടുത്ത് വലത്തേകാലിൽ വച്ച അവസ്ഥയാണ് ഇപ്പോൾ. കമ്പം ടൗണിലൊന്നും ആനയിറങ്ങി ചരിത്രമില്ല. കുമളി ടൗണിൽ ആനയിറങ്ങിയിട്ടുണ്ടോ? ഇപ്പോൾ ഈ ആന കുമളിയിലിറങ്ങിയേനെ.

ഈ ആന ഒരുപാട് യാത്ര ചെയ്തിട്ടുണ്ട്. നല്ല ആരോഗ്യവാനാണ് അവൻ. 45 കിലോമീറ്ററോളം യാത്ര ചെയ്തിട്ടുണ്ട്.തമിഴ്‌നാട്ടിൽ കപട ആന പ്രേമികളില്ല,​ ഇവിടെ എല്ലാം പബ്ലിസിറ്റിക്ക് വേണ്ടി ചെയ്യുന്നതാണ്.​ ഈ വിഷയത്തിൽ സർക്കാരിനെ കുറ്റം പറയാനാകില്ലെന്നും അവരുടെ തിരുമാനം ഇതായിരുന്നില്ലെന്നും ഗണേഷ് കുമാർ കൂട്ടിച്ചേർത്തു.