ഒരുകാലത്ത് സീരിയലുകളിലും ടെലിവിഷന്‍ കോമഡി ഷോകളിലും സ്ഥിര സാന്നിധ്യമായിരുന്ന നടി പ്രജുഷ. കടന്നു പോകുന്ന പ്രതിസന്ധിയെ കുറിച്ച് യൂട്യൂബ് ചാനലിന് നല്‍കിയ അഭിമുഖത്തില്‍ താരം തുറന്നു പറഞ്ഞിരിക്കുകയാണ്. ഭര്‍ത്താവ് കുമാര്‍ നന്ദ ഒരു സിനിമാ സംവിധായകനാണ്. സാമ്പത്തികമായി നല്ല കുടുംബത്തിലാണ് അദ്ദേഹം ജനിച്ച് വളര്‍ന്നത്. ആരെയും അന്ധമായി വിശ്വസിക്കുന്ന ഒരു പ്രകൃതമാണ്. ദിലീപ് അഭിനയിച്ച 'ലൈഫ് ഓഫ് ജോസൂട്ടി' എന്ന ചിത്രം ഇപ്പോഴും നീറുന്ന ഓര്‍മ്മയാണ്. ആ ചിത്രത്തിന്റെ തിരക്കഥ ഭര്‍ത്താവിന്റേതാണ്.

''ജോസൂട്ടിയുടെ സുവിശേഷം'' എന്നാണ് അദ്ദേഹം അതിന് പേരിട്ടിരുന്നത്. തിരക്കഥ സംവിധാനം ചെയ്യാനും അദ്ദേഹം ആഗ്രഹിച്ചിരുന്നപ്പോള്‍ ഒരു നിര്‍മ്മാതാവിനെ ലഭിച്ചു. ശ്രീലങ്കയില്‍ ഷൂട്ടിംഗ് ആരംഭിച്ചെങ്കിലും ആഭ്യന്തരയുദ്ധം പ്രശ്‌നമായി. നിര്‍മ്മാതാവിന് വലിയ നഷ്ടം സംഭവിക്കുകയും ചെയ്തു. പിന്നീട് അറിയുന്നത് ഈ പ്രൊജക്ട് സംവിധായകന്‍ ജീത്തു ജോസഫിനെ ഏല്‍പ്പിച്ചു എന്നാണ്. ശ്രീലങ്കയില്‍ സംഭവിച്ച നഷ്ടം ചൂണ്ടിക്കാട്ടി തിരക്കഥയുടെ അവകാശം നിര്‍മ്മാതാവ് സ്വന്തമാക്കി.

ആ തിരക്കഥ കുമാര്‍ നന്ദയുടേതാണെന്ന് ഇന്നും പലര്‍ക്കും അറിയില്ല. ഭര്‍ത്താവ് കാണിച്ച ആത്മാര്‍ത്ഥതയ്ക്ക് പ്രതിഫലം ലഭിച്ചില്ല. മനസ്സ് തകര്‍ന്ന ഞാന്‍ ആ സത്യം വെളിപ്പെടുത്താന്‍ പത്രസമ്മേളനം വിളിക്കാന്‍ തീരുമാനിച്ചു. എന്നാല്‍ ഭര്‍ത്താവ് സമ്മതിച്ചില്ല. സിനിമ ബാന്‍ ചെയ്യണമെന്നും ഞാന്‍ ആഗ്രഹിച്ചിരുന്നു, പ്രജുഷ പറഞ്ഞു.