നെടുമ്പാശേരിയില്‍ യുവാവിനെ കാറിടിച്ച് കൊലപ്പെടുത്തി
നെടുമ്പാശേരിയില്‍ യുവാവിനെ കാറിടിപ്പിച്ച് കൊലപ്പെടുത്തിയ കേസില്‍ സിഐഎസ്എഫ് ഉദ്യോഗസ്ഥര്‍ റിമാന്‍ഡില്‍. സിഐഎസ്എഫ് എസ്‌ഐ വിനയകുമാര്‍ ദാസ് (38), കോണ്‍സ്റ്റബിള്‍ മോഹന്‍കുമാര്‍ (31) എന്നിവരെയാണ് അങ്കമാലി ജെഎഫ്എം കോടതി റിമാന്‍ഡ് ചെയ്തത്. ഈ മാസം 29 വരെയാണ് റിമാന്‍ഡ് കാലാവധി. വാഹനം ഉരസിയതിനെ ചൊല്ലിയുള്ള തര്‍ക്കത്തിനിടെയുണ്ടായ ആക്രമണത്തില്‍ അങ്കമാലി തുറവൂര്‍ ആരിശേരില്‍ ഐവിന് ജിജോ (24) ആണ് കൊല്ലപ്പെട്ടത്.
പ്രതികള്‍ കാറെടുത്ത് പോകാന്‍ ശ്രമിച്ചപ്പോള്‍ ഐവിന് തടഞ്ഞത് പ്രകോപനത്തിന് കാരണമായി എന്നാണ് വിവരം. ഐവിനെ കൊലപ്പെടുത്തണം എന്ന ഉദ്ദേശത്തോടുകൂടിയാണ് കാര്‍ ഇടിപ്പിച്ചതെന്നും കാറിനടിയില്‍പ്പെട്ട ഐവിനെ 37 മീറ്റര്‍ വലിച്ചിഴച്ചെന്നും റിമാന്‍ഡ് റിപ്പോര്‍ട്ടില്‍ പറയുന്നു.
അതേസമയം, കൊല്ലപ്പെട്ട ഐവിന്റെ സംസ്‌കാരം നടത്തി. കൊച്ചി വിമാനത്താവളത്തിനു സമീപം നായത്തോട് ബുധന്‍ രാത്രി പത്തോടെയാണ് നാടിനെ നടുക്കിയ ക്രൂരത നടന്നത്. നെടുമ്പാശേരിയിലെ കാസിനോ എയര്‍ കാറ്ററേഴ്സ് ആന്‍ഡ് ഫ്‌ലൈറ്റ് സര്‍വീസസ് എന്ന കാറ്ററിങ് സ്ഥാപനത്തിലെ ഷെഫായിരുന്ന ഐവിന് ജോലിസ്ഥലത്തേക്ക് തുറവൂരിലെ വീട്ടില്‍നിന്ന് കാറില്‍ പോവുകയായിരുന്നു.
നായത്തോട് തോമ്പ്ര റോഡില്‍ ഐവിന്റെയും സിഐഎസ്എഫ് ഉദ്യോഗസ്ഥരുടെയും കാറുകള്‍ തമ്മില്‍ ഉരസി. ഇതേച്ചൊല്ലി തര്‍ക്കമുണ്ടായി. സിഐഎസ്എഫുകാര്‍ ഇതിനിടെ കാര്‍ മുന്നോട്ടെടുത്തു. വിനയകുമാര്‍ ദാസാണ് കാറോടിച്ചിരുന്നത്. വാഹനത്തിന്റെ മുന്നിലുണ്ടായിരുന്ന ഐവിനെ ഇടിച്ച് തെറിപ്പിച്ചു.
ബോണറ്റിലേക്ക് വീണ ഐവിനുമായി അമിതവേഗത്തില്‍ സഞ്ചരിച്ചു. നിലവിളിച്ചെങ്കിലും കാര്‍ നിര്‍ത്തിയില്ല. സംഭവം കണ്ട ചിലര്‍ കാറിനെ പിന്തുടര്‍ന്നു. ഇതോടെ സെന്റ് ജോണ്‍സ് യാക്കോബായ ചാപ്പലിനും സെന്റ് സെബാസ്റ്റ്യന്‍സ് കപ്പേളയ്ക്കുമിടയില്‍ കാര്‍ പെട്ടെന്ന് നിര്‍ത്തിയപ്പോള്‍ റോഡിലേക്ക് ഐവിന് വീണു. കാര്‍ ഐവിന്റെ ദേഹത്തുകൂടി കയറ്റി. അടിയില്‍ കുടുങ്ങിയ ഐവിനെ ഏറെ ദൂരം വലിച്ചിഴച്ചു.
നാട്ടുകാര്‍ ആശുപത്രിയില്‍ എത്തിച്ചപ്പോഴേക്കും ഐവിന് മരിച്ചു. കാറിന് വെളിയില്‍ റോഡില്‍ വീണനിലയില്‍ കണ്ടെത്തിയ വിനയകുമാറിനെ ആദ്യം അങ്കമാലിയിലെ സ്വകാര്യ ആശുപത്രിയിലും പിന്നീട് എറണാകുളം ഗവ. മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. രക്ഷപ്പെട്ട മോഹന്‍കുമാറിനെ പിന്നീട് സിഐഎസ്എഫ് ഓഫീസില്‍നിന്നാണ് അറസ്റ്റ് ചെയ്തത്.
സംഭവത്തിന്റെ ദൃശ്യങ്ങളും നടുക്കുന്നതായിരുന്നു. ഇടിച്ചുവീഴ്ത്തിയശേഷം ബോണറ്റില്‍ ഐവിനുമായി അതിവേഗം കാര്‍ കുതിക്കുന്നതും പിന്നീട് യുവാവ് ദേഹമാസകലം ചോരയില്‍ കിടക്കുന്ന ദൃശ്യങ്ങളുമാണ് പുറത്തുവന്നത്. പ്രദേശത്തെ സിസിടിവിയില്‍നിന്നാണ് ദൃശ്യങ്ങള്‍ പൊലീസിന് ലഭിച്ചത്. സിഐഎസ്എഫുകാരുമായുള്ള തര്‍ക്കം ഐവിന് സ്വന്തം മൊബൈല്‍ഫോണില്‍ പകര്‍ത്തിയിട്ടുണ്ട്. ഇതിനുശേഷമാണ് ഉദ്യോഗസ്ഥര്‍ വാഹനമിടിപ്പിച്ചത്.
https://www.facebook.com/Malayalivartha
