പാകിസ്ഥാനെ രഹസ്യമായി സഹായിച്ചതിനും രഹസ്യ വിവരങ്ങൾ പങ്കുവെച്ചതിനും പൊലീസ് പിടിയലായ ജ്യോതി മൽഹോത്ര എന്ന ട്രാവൽ- ലൈഫ് വ്ലോഗർക്കെതിരെ പോലീസ് പിടി മുറുകുന്നു. ഹരിയാനയിൽ നിന്നുള്ള ഈ ട്രാവൽ- ലൈഫ് വ്ലോഗർ ഇന്ത്യയ്ക്കെതിരെ ചാരവൃത്തി ചെയ്തു എന്ന ആരോപണത്തിൽ നിരവധി വിവാദങ്ങളിലാണ് അകപ്പെട്ടിരിക്കുന്നത്. 

ഇപ്പോഴിതാ അതിലേക്ക് നമ്മുടെ കേരളത്തിന്റെ പേരും കൂടി ഉയർന്നു കേൾക്കുകയാണ് . പാക്കിസ്ഥാനുവേണ്ടി ചാരവൃത്തി നടത്തിയെന്ന കേസില്‍ അറസ്റ്റിലായ വ്ളോഗര്‍ ഹരിയാണയിലെ ജ്യോതി മല്‍ഹോത്രയ്ക്ക് കണ്ണൂരിലും ബന്ധങ്ങളെന്ന വിവരം പുറത്തുവന്നു. കഴിഞ്ഞ തെയ്യക്കാലത്ത് കളിയാട്ടങ്ങളുടെ ഭൂമികയായ പയ്യന്നൂരിലും ഇവര്‍ എത്തിയിട്ടുണ്ടെന്ന തെളിവുകളാണ് ലഭ്യമായത്.

ഏതു ഗൈഡിന്റെ കൂടെയാണ് ഇവര്‍ പയ്യന്നൂര്‍ സന്ദര്‍ശിച്ചതെന്ന കാര്യമാണ് അന്വേഷിച്ചു വരുന്നത്.ഏഴിമല നാവിക അക്കാദമി ഉള്‍പ്പെടെയുള്ള ദക്ഷിണേന്ത്യയിലെ തന്ത്ര പ്രധാന കേന്ദ്രങ്ങളിലൊന്നാണ് പയ്യന്നൂര്‍. അതുകൊണ്ടുതന്നെ അതീവ ഗൗരവകരമായാണ് കേന്ദ്ര രഹസ്യാന്വേഷണ വിഭാഗം ഈ കാര്യത്തെ കുറിച്ചു അന്വേഷണം നടത്തുന്നത്.പയ്യന്നൂരിലെ കാങ്കോല്‍ ആലക്കാട് കാശിപുരം വനശാസ്താ ക്ഷേത്രത്തില്‍ ജ്യോതി മല്‍ഹോത്ര എത്തിയതായാണ് കരുതുന്നത്. ഇവിടെ ഉത്സവത്തിന്റെ വീഡിയോ വ്ളോഗ് ചെയ്തതില്‍ നിന്നാണ് ഈക്കാര്യം വ്യക്തമാകുന്നത്. 

കഴിഞ്ഞ ജനുവരിയില്‍ കേരളത്തില്‍ നടത്തിയ ഏഴ് ദിവസത്തെ സന്ദര്‍ശനത്തിനിടെ ജ്യോതി കാശിപുരം വനശാസ്താ ക്ഷേത്രത്തില്‍ എത്തിയതായാണ് പൊലീസ് കരുതുന്നത്. കേരള സന്ദര്‍ശനത്തിനിടെ ജ്യോതി കൊച്ചി മട്ടാഞ്ചേരിയിലെ കപ്പല്‍ശാലയിലും സന്ദര്‍ശനം നടത്തിയതായാണ് പൊലീസിന് ലഭിച്ചിരിക്കുന്ന വിവരം.