വിദേശത്ത് നിന്ന് കടത്താന്‍ ശ്രമിച്ച പത്തുകിലോ ഹൈബ്രിഡ് കഞ്ചാവ് തിരുവനന്തപുരം വിമാനത്താവളത്തില്‍ എയര്‍ കസ്റ്റംസ് പിടികൂടി. സംഭവത്തില്‍ സിംഗപ്പൂരില്‍ ഉപരിപഠനം നടത്തുന്ന വിദ്യാര്‍ത്ഥിയും വിദ്യാര്‍ത്ഥിനിയും കസ്റ്റംസിന്റെ കസ്റ്റഡിയിലായി.

ഇവര്‍ ലഗേജില്‍ ഒളിപ്പിച്ച് കടത്താന്‍ ശ്രമിച്ച കഞ്ചാവിന് 10 കോടി രൂപ വിലമതിക്കുമെന്നാണ് അധികൃതര്‍ പറയുന്നത്. ഇത്രയും രൂപയുടെ ഹൈബ്രിഡ് കഞ്ചാവ് ആദ്യമായാണ് വിമാനത്താവളത്തില്‍ പിടികൂടുന്നത്. ശനിയാഴ്ച രാത്രി 11.10ന് സിംഗപ്പൂരില്‍ നിന്നുമെത്തിയ സ്‌കൂട്ട് എയര്‍ലൈന്‍സിന്റെ ടി.ആര്‍ 530ാം നമ്പര്‍ വിമാനത്തിലെ യാത്രക്കാരായിരുന്നു ഇവര്‍. വിശദമായി ചോദ്യം ചെയ്യേണ്ടതിനാല്‍ ഇവരുടെ കൂടുതല്‍ വിവരങ്ങള്‍ കസ്റ്റംസ് പുറത്തുവിട്ടിട്ടില്ല.

വിമാനത്തില്‍ നിന്നും ടെര്‍മിനലിനുള്ളില്‍ പ്രവേശിച്ചപ്പോള്‍ അധികൃതര്‍ക്ക് ഇവരെ സംശയം തോന്നി. കണ്‍വേയര്‍ ബെല്‍റ്റില്‍ നിന്നും ഇവര്‍ ലഗേജുകളുമായി പുറത്തുകടക്കാന്‍ ശ്രമിക്കുമ്പോള്‍ അധികൃതര്‍ തിരിച്ചുവിളിച്ച് ലഗേജുകള്‍ പരിശോധിക്കുകയായിരുന്നു. രാത്രി വൈകിയും ചോദ്യം ചെയ്യല്‍ തുടരുകയാണ്. കഞ്ചാവിന്റെ ഉറവിടവും ആര്‍ക്ക് വില്‍ക്കാനാണ് കൊണ്ടുവന്നത് എന്നതടക്കമുള്ള വിവരങ്ങളും എയര്‍കസ്റ്റംസിന്റെ ഉന്നത ഉദ്യോഗസ്ഥര്‍ ശേഖരിച്ചുവരികയാണ്.