കെ.എസ്.ആര്‍.ടി.സി സ്വിഫ്റ്റ് സൂപ്പര്‍ ഫാസ്റ്റ് ബസും വിവാഹനിശ്ചയ സംഘം സഞ്ചരിച്ച ടൂറിസ്റ്റ് ബസും കൂട്ടിയിടിച്ച് 66 പേര്‍ക്ക് പരിക്കേറ്റു. ഇന്നലെ രാവിലെ 10.15ന് എം.സി റോഡില്‍ ക്രിസ്ത്യന്‍ കോളേജ് ജംഗ്ഷനിലായിരുന്നു അപകടം സംഭവിച്ചത്.

പരിക്കേറ്റ നാല് പേരുടെ നില ഗുരുതരമാണ്. ഇവരെ കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റി. സാരമായ പരിക്കില്ലാത്തവരെ ചെങ്ങന്നൂര്‍ ജില്ലാ ആശുപത്രിയിലും കല്ലിശ്ശേരിയിലും മാന്നാറുമുള്ള സ്വകാര്യ ആശുപത്രികളിലും പ്രവേശിപ്പിച്ചു.

അടൂര്‍ പള്ളിക്കല്‍ ആനയടിയില്‍ നിന്ന് മണിമല പത്തനാട്ടേക്ക് പുറപ്പെട്ടതായിരുന്നു വിവാഹ നിശ്ചയ സംഘം. അടിമാലിയില്‍ നിന്ന് തിരുവനന്തപുരത്തേക്കുള്ള യാത്രയിലായിരുന്നു സിഫ്റ്റ് ബസ്.

അപകടം നടന്ന ഉടനെ സമീപവാസികള്‍ രക്ഷാപ്രവര്‍ത്തനം തുടങ്ങി. ഫയര്‍ഫോഴ്‌സും പൊലീസും സ്ഥലത്തെത്തിയിരുന്നു. മന്ത്രി സജി ചെറിയാന്‍, എംപിമാരായ ആന്റോ ആന്റണി, കൊടിക്കുന്നില്‍ സുരേഷ്, നഗരസഭ ചെയര്‍പേഴ്‌സണ്‍ ശോഭ വര്‍ഗീസ്, നഗരസഭ വൈസ് ചെയര്‍മാന്‍ കെ.ഷിബുരാജന്‍ എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി.

കെ.എസ്.ആര്‍.ടി.സി ബസ് മുന്‍പില്‍ ഉണ്ടായിരുന്ന കാറിനെ മറികടക്കുന്നതിനിടെയാണ് അപകടം സംഭവിച്ചത്.