സംസ്ഥാനത്ത് ഹെവി വാഹനങ്ങള്ക്ക് ബ്ലൈന്ഡ് സ്പോട്ട് മിറര് നിര്ബന്ധമാക്കും...
സംസ്ഥാനത്ത് ഹെവി വാഹനങ്ങള്ക്ക് ബ്ലൈന്ഡ് സ്പോട്ട് മിറര് നിര്ബന്ധമാക്കും. സ്റ്റേറ്റ് ട്രാന്സ്പോര്ട്ട് അതോറിറ്റിയുടെയാണ് തീരുമാനം. കെ.എസ്.ആര്.ടി.സി ബസുകള്ക്കും സ്കൂള് വാഹനങ്ങള്ക്കും നിര്ദേശം ബാധകമായിരിക്കും . ഈ ഉത്തരവ് പ്രകാരം ഹെവി വാഹനങ്ങളുടെ ഇരുവശത്തും ബ്ലൈന്ഡ് സ്പോട്ട് മിററുകള് ഘടിപ്പിക്കേണ്ടതാണ്.
ഡ്രൈവര്ക്ക് കാണാന് കഴിയാത്ത ഭാഗങ്ങള് ഈ മിററിലൂടെ കാണാന് സാധിക്കും. ഇത് അപകടങ്ങള് ഒഴിവാക്കാനും സഹായിക്കും. നിയമം പ്രാബല്യത്തില് വന്നാല് വാഹന പരിശോധനയില് ബ്ലൈന്ഡ് സ്പോട്ട് മിററുകള് ഇല്ലാത്ത വാഹനങ്ങള്ക്കെതിരെ മോട്ടോര് വാഹന വകുപ്പ് നടപടിയെടുക്കും.
നിയമലംഘനത്തിന് പിഴയും ചുമത്തും. ഹെവി വാഹന ഡ്രൈവര്മാരുടെ ബ്ലൈന്ഡ് സ്പോട്ടുകളിലാണ് കൂടുതല് അപകടങ്ങള് നടന്നിട്ടുള്ളത് എന്ന റിപ്പോര്ട്ടിന്റെ അടിസ്ഥാനത്തിലാണ് തീരുമാനം.
ബ്ലൈന്ഡ് സ്പോട്ട് മിററിന്റെ ശരിയായ ഉപയോഗം സംബന്ധിച്ച് ഡ്രൈവര്മാര്ക്ക് മോട്ടോര് വാഹന വകുപ്പ് ബോധവത്കരണം നല്കണമെന്നും സ്റ്റേറ്റ് ട്രാന്സ്പോര്ട്ട് അതോറിറ്റി നിര്ദേശിച്ചിരിക്കുകയാണ്. ഡ്രൈവിങ് സ്കൂളുകള് ഇതേപ്പറ്റി പഠിപ്പിക്കണമെന്നും നിര്ദേശമുണ്ട്.
അതേസമയം വാഹനം ഓടിക്കുമ്പോള് ഡ്രൈവര്ക്ക് കാണാന് കഴിയാത്ത ഭാഗങ്ങളാണ് ബ്ലൈന്ഡ് സ്പോട്ടുകള് . കാറുകള്, ട്രക്കുകള്, ബസുകള് തുടങ്ങിയ വലിയ വാഹനങ്ങളില് ഈ ബ്ലൈന്ഡ് സ്പോട്ടുകള് വളരെ വലുതായിരിക്കും. ഇത് റോഡില് വലിയ അപകടങ്ങള്ക്ക് കാരണമാകാറുണ്ട്.
ഈ പ്രശ്നം പരിഹരിക്കാന് സഹായിക്കുന്ന ഒന്നാണ് ബ്ലൈന്ഡ് സ്പോട്ട് മിററുകള്. സാധാരണ മിററുകള്ക്ക് പുറമെ വാഹനത്തിന്റെ സൈഡ് മിററുകളില് ഘടിപ്പിക്കുന്ന ചെറുതും വളഞ്ഞതുമായ കോണ്വെക്സ് കണ്ണാടിയാണ് ബ്ലൈന്ഡ് സ്പോട്ട് മിറര്. ഈ മിററുകള് കൂടുതല് കാഴ്ചാപരിധി നല്കുന്നതുകൊണ്ട് ഡ്രൈവര്ക്ക് ബ്ലൈന്ഡ് സ്പോട്ടുകളില് മറഞ്ഞിരിക്കുന്ന മറ്റ് വാഹനങ്ങളെയോ കാല്നടയാത്രക്കാരെയോ കാണാന് കഴിയും.
ബ്ലൈന്ഡ് സ്പോട്ടുകള് കാരണം സംഭവിക്കാവുന്ന അപകടങ്ങള് വലിയ അളവില് കുറക്കാന് സഹായിക്കുന്നു . വാഹനം ഒരു ലൈനില് നിന്ന് മറ്റൊരു ലൈനിലേക്ക് മാറ്റുമ്പോള്, ബ്ലൈന്ഡ് സ്പോട്ടില് വാഹനങ്ങളില്ലെന്ന് ഉറപ്പുവരുത്താന് ഈ മിററുകള് സഹായിക്കുന്നു.
ഇടുങ്ങിയ സ്ഥലങ്ങളില് വാഹനം പാര്ക്ക് ചെയ്യുമ്പോള് ബ്ലൈന്ഡ് സ്പോട്ട് മിററുകള് വഴി പിന്നിലുള്ള വസ്തുക്കളെയും തടസ്സങ്ങളെയും വ്യക്തമായി കാണാനായി കഴിയും.
"
https://www.facebook.com/Malayalivartha
