രാഹുല്‍ മാങ്കൂട്ടത്തിലിനെതിരെ ലഭിച്ച പരാതികളില്‍ കേസെടുക്കുന്ന കാര്യത്തില്‍ നിയമോപദേശം തേടാനൊരുങ്ങി പൊലീസ്. പരാതിയുമായി ഇരകള്‍മുന്നോട്ട് വരാത്തതാണ് പൊലീസിനെ കുഴയ്ക്കുന്നത്. ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെ എടുത്ത കേസുകള്‍ അവസാനിപ്പിക്കേണ്ടി വന്ന സാഹചര്യത്തിലാണ് നടപടി. ഇരകള്‍ പരാതിയുമായി മുന്നോട്ടില്ലെങ്കില്‍ കേസ് അവസാനിപ്പിക്കേണ്ടി വരുമെന്നാണ് സൂചന. പരാതിക്കാരനായ എച്ച്.ഹഫീസിന്റെ മൊഴി ഇന്ന് വൈകിട്ട് 3 മണിക്ക് രേഖപ്പെടുത്തും. നിയമോപദേശം ലഭിക്കുന്ന മുറയ്ക്ക് തുടര്‍ നടപടികള്‍ സ്വീകരിക്കാമെന്നാണ് പൊലീസ് തീരുമാനം.

രാഹുലില്‍ നിന്ന് തൃപ്തികരമായ മറുപടി ലഭിച്ചില്ലെന്ന് കോണ്‍ഗ്രസ് നേതൃത്വം വ്യക്തമാക്കി. തനിക്കെതിരെ പാര്‍ട്ടിയില്‍ നിന്ന് ഗൂഢാലോചന നടന്നിട്ടുണ്ട് എന്നാണ് രാഹുല്‍ മാങ്കൂട്ടത്തിലിന്റെ വാദം. നേതൃത്വവുമായി ആശയവിനിമയത്തിലാണ് ഇക്കാര്യം അറിയിച്ചത്. എന്നാല്‍ വാദം മുഖവിലക്കെടുക്കാത്ത കോണ്‍ഗ്രസ് നേതൃത്വം ആരോപണങ്ങള്‍ക്ക് രാഹുല്‍ തന്നെ മറുപടി പറയട്ടെ എന്ന നിലപാടിലാണ്.