ഇടുക്കിയില്‍ ആദിവാസി യുവാവിനെ വീടിനുള്ളില്‍ മരിച്ച നിലയില്‍ കണ്ടെത്തി
ഇടുക്കിയില്‍ ആദിവാസി യുവാവിനെ വീടിനുള്ളില്‍ രക്തംവാര്‍ന്ന് മരിച്ച നിലയില്‍ കണ്ടെത്തി. മറയൂര്‍ ഇന്ദിരാ നഗര്‍ സ്വദേശി സതീഷിനെയാണ് (35) മരിച്ച നിലയില്‍ കണ്ടെത്തിയത്. തലയ്ക്ക് പരിക്കേറ്റ നിലയില്‍ രക്തംവാര്‍ന്ന അവസ്ഥയിലായിരുന്നു മൃതദേഹം. ഇന്ന് രാവിലെ സതീഷിനെ അന്വേഷിച്ച് ബന്ധുക്കള്‍ വീട്ടിലെത്തിയ സമയത്താണ് മരിച്ച നിലയില്‍ സതീഷിനെ കണ്ടെത്തുന്നത്. കഴിഞ്ഞ ദിവസവും വിറക് ശേഖരിക്കാനും വിറക് വില്‍ക്കാനുമെല്ലാമായി സതീഷ് സുഹൃത്തുക്കള്‍ക്കൊപ്പം പോയിരുന്നു.
ഡിവൈഎസ്പിയുടെ നേതൃത്വത്തിലുള്ള സംഘം സതീഷിന്റെ വീട്ടിലെത്തിയിട്ടുണ്ട്. ഇന്‍ക്വസ്റ്റ് നടപടികള്‍ നടത്തിവരികയാണ്. ഫോറന്‍സിക് പരിശോധനയില്‍ മാത്രമേ മരണകാരണം സംബന്ധിച്ച പ്രാഥമിക നിഗമനത്തിലെത്താന്‍ സാധിക്കുകയുള്ളു എന്ന് പൊലീസ് അറിയിച്ചു. ദുരൂഹ സാഹചര്യത്തില്‍ കണ്ടെത്തിയതിനും അസ്വാഭാവിക മരണത്തിനും പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
https://www.facebook.com/Malayalivartha
