മണിയുടെ മരണകാരണത്തെക്കുറിച്ചുള്ള ആശയക്കുഴപ്പം അകറ്റാന്‍ വിദഗ്ദ്ധ മെഡിക്കല്‍ സംഘം രൂപീകരിക്കും. ഫൊറന്‍സിക്, രാസപരിശോധന വിദഗ്ധര്‍ക്കുപുറമെ മണിയെ ചികിത്സിച്ച ഡോക്ടര്‍മാരും അടങ്ങുന്നതാണ് സംഘം. അതോടൊപ്പം ആന്തരികാവയവങ്ങളിലെ വിഷപദാര്‍ത്ഥങ്ങളുെട അളവുവ്യക്തമാക്കുന്ന റിപ്പോര്‍ട്ട് നല്‍കണമെന്ന് കാക്കനാട് കെമിക്കല്‍ ലാബിനോട് അന്വേഷണസംഘം പ്രത്യേകം ആവശ്യപ്പെട്ടു. 
മണിയുടെ ശരീരത്തിലെ കീടനാശിനിയെ സംബന്ധിച്ച് രണ്ട് റിപ്പോര്‍ട്ടുകളാണ് അന്വേഷണസംഘത്തിനു ലഭിച്ചിരിക്കുന്നത്. ഒന്ന്, ക്‌ളോര്‍പൈറിഫോസ് എന്ന കീടനാശിനിയും മെഥനോളും ശരീരത്തിലുണ്ടെന്ന കാക്കാനാട് ലാബിലെ രാസപരിശോധനാഫലും അതിനെ ആസ്പദമാക്കിയുള്ള പോസ്റ്റുമോര്‍ട്ടം റിപ്പോര്‍ട്ടും. രണ്ട്, കീടനാശിനിയില്ല, മെഥനോള്‍ മാത്രമേയുള്ളെന്ന മണിയെ ചികിത്സിച്ച കൊച്ചിയിലെ ആശുപത്രിയിലെ പരിശോധനാഫലവും ഡോക്ടര്‍മാരുടെ മൊഴിയും. റിപ്പോര്‍ട്ടുകളിലെ വൈരുധ്യം മൂലം മരണകാരണത്തില്‍ ആശയക്കുഴപ്പം പരിഹരിക്കാനാണ് വിദഗ്ദ്ധരടങ്ങിയ സംഘം രൂപീകരിക്കാന്‍ ഡിജിപി ടി.പി.സെന്‍കുമാര്‍ നിര്‍ദേശിച്ചത്. ഇതിനായി മെഡിക്കല്‍ വിദ്യാഭ്യാസ ഡയറക്ടര്‍ക്ക് അന്വേഷണസംഘം കത്തെഴുതും. സംഘത്തിനു പഠനം നടത്തണമെങ്കില്‍ ശരീരത്തിലുള്ള ഓരോ കീടനാശിനിയുടെയും അളവ് ലഭിക്കണം. അതിനായി അളവ് വ്യക്തമാക്കി റിപ്പോര്‍ട്ട് നല്‍കാന്‍ കാക്കാനാട് കെമിക്കല്‍ ലാബിനോട് ആവശ്യപ്പെട്ടിട്ടുണ്ട്. 
ഒപ്പം സാംപിളുകള്‍ ഹൈദരാബാദിലെ കേന്ദ്ര ഫൊറന്‍സിക് ലാബിലും പരിശോധിക്കും. രണ്ട് കാര്യങ്ങളാണ് സംഘം പ്രധാനമായും പരിശോധിക്കുന്നത്. ഒന്ന്, ഓരോ വിഷപദാര്‍ത്ഥവും മരണത്തിന് എത്രത്തോളം കാരണമായി. രണ്ട് കീടനാശിനി ഭക്ഷണത്തിലൂടെ ശരീരത്തിലെത്താനും അടിഞ്ഞുകൂടാനും സാധ്യതയുണ്ടോ. ഇതുവരെയുള്ള അന്വേഷണത്തില്‍ കൊലപാതക ആത്മഹത്യ സാധ്യതകള്‍ കാണാത്തതിനാല്‍ സ്വാഭാവിക മരണമെന്നാണ് പൊലീസ് സംശയിക്കുന്നത്. സംഘത്തിന്റെ പഠനത്തിന്റെ അടിസ്ഥനത്തിലാവും അന്തിമ നിഗമനത്തിലെത്തുക.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha