കേരളത്തിലെ ആരോഗ്യരംഗത്തെ പ്രകീര്ത്തിച്ച് സ്പെയിന് വനിത
ഒരു സര്ക്കാര് ആശുപത്രി ഇത്തരത്തില് പ്രവര്ത്തിക്കുന്നു എന്നത് എന്നെ സംബന്ധിച്ച് അവിശ്വസനീയമായ കാര്യമാണെന്ന് കേരളത്തിലെ ആരോഗ്യരംഗത്തെ പ്രകീര്ത്തിച്ച് സ്പെയിനില് നിന്നുള്ള സോളോ ട്രാവലര് വെറോനിക്ക. ആലപ്പുഴയിലെ ജനറല് ആശുപത്രിയിലെത്തിയ അനുഭവമാണ് യുവതി വീഡിയോ ആയി ഇന്സ്റ്റഗ്രാമില് പങ്കുവച്ചിരിക്കുന്നത്.
'സത്യത്തില് ഇതെനിക്ക് വിശ്വസിക്കാന് കഴിഞ്ഞില്ല. ഒരു സര്ക്കാര് ആശുപത്രി ഇത്തരത്തില് പ്രവര്ത്തിക്കുന്നു എന്നത് എന്നെ സംബന്ധിച്ച് അവിശ്വസനീയമായ കാര്യമാണ്. ഇന്ത്യയില് മുഴുവന് സ്ഥലത്തും ഇത്തരത്തിലാണോ എന്നെനിക്ക് അറിയില്ല. എന്റെ നാടായ സ്പെയിനില് ഒരു ഡെര്മറ്റോളജിസ്റ്റിനെ കാണണമെങ്കില് ഏകദേശം എട്ട് മാസത്തോളം കാത്തിരിക്കണം.
എന്നാല്, ഇന്ത്യയില് നേരത്തേ ബുക്ക് ചെയ്യേണ്ട. നേരെ ആശുപത്രിയിലേക്ക് എത്തിയാല് മതി. അപ്പോള് തന്നെ രജിസ്റ്റര് ചെയ്യാം. പത്ത് മിനിട്ടില് താഴെ മാത്രം കാത്തിരുന്നാല് മതി. ഇതെല്ലാം ഒരു സര്ക്കാര് ആശുപത്രിയിലാണ് സംഭവിച്ചത് എന്നതാണ് ഏറ്റവും വലിയ കാര്യം' വെറോനിക്ക വീഡിയോയില് പറഞ്ഞു.
ഇതിനോടകം ലക്ഷക്കണക്കിന് ആളുകളാണ് വെറോനിക്കയുടെ വീഡിയോ കണ്ടത്. നിരവധി മലയാളികള് വീഡിയോ പങ്കുവച്ചു. കേരളത്തിലെ സര്ക്കാര് ആശുപത്രിയില് നിന്നുണ്ടായ അനുഭവം ഇന്ത്യയിലെ മറ്റ് സംസ്ഥാനങ്ങളില് നിന്ന് പ്രതീക്ഷിക്കരുത് എന്നാണ് ഭൂരിഭാഗംപേരും കമന്റിട്ടിരിക്കുന്നത്. കഴിഞ്ഞ കുറച്ച് കാലമായി ഇന്ത്യയിലെ വിവിധ സ്ഥലങ്ങളില് യാത്ര ചെയ്തുവരികയാണ് വെറോനിക്ക. കേരളത്തില് വീണ്ടും വരണമെന്നാണ് വീഡിയോയ്ക്ക് താഴെ വന്നിരിക്കുന്ന കമന്റുകള്.
https://www.facebook.com/Malayalivartha
