പതിനേഴുകാരന്റെ കുട്ടിക്കളിയില് പൊലിഞ്ഞ ജയബാലകൃഷ്ണന്റെ തട്ടുകട തുറന്നു ഭാര്യയും മകളും

കണ്ടെയ്നര് റോഡില് പതിനേഴുകാരന് ഓടിച്ച കാര് ഇടിച്ചു മരിച്ച ജയബാലകൃഷ്ണന്റെ തട്ടുകടയാണ് ഇന്നലെ മുതല് ഭാര്യ ബിന്ദുവും മകള് ഭദ്രകീര്ത്തിയും ചേര്ന്നു തുറന്നത്. ജയബാലകൃഷ്ണന്റെ ചിത്രത്തിനു താഴെ തിരി തെളിച്ചാണ് കട വീണ്ടും തുടങ്ങിയത്. ജയബാലകൃഷ്ണന്റെ മരണത്തോടെ കുടുംബത്തിന്റെ ജീവിതമാര്ഗവും ഏറെ പ്രതിസന്ധിയിലായിരുന്നു. ഇതോടെയാണ് തട്ടുകട വീണ്ടും തുറക്കാന് കുടുംബം തീരുമാനിച്ചത്.
ജയബാലകൃഷ്ണന് നല്കിയിരുന്ന ദോശയും ചമ്മന്തിയും ഓംലെറ്റും ചായയുമാണ് വീണ്ടും ഇന്നലെ വിളമ്പിയത്. ഹൈദരാബാദിലെ ജോലി തല്ക്കാലത്തേക്ക് ഉപേക്ഷിച്ചാണ് ഭദ്രകീര്ത്തി കടയില് നില്ക്കുന്നത്. കേസിന്റെ കാര്യങ്ങള് കൃത്യമായി നോക്കുന്നുണ്ടെന്നും എതിര് ഭാഗത്ത് ജഡ്ജിയായതിനാല് പ്ലാനിങ്ങോടു കൂടിയാണ് കേസ് നടത്തുന്നതെന്നും ഭദ്ര കീര്ത്തി പറഞ്ഞു.
അതേസമയം കേസിലെ ഒന്നാം പ്രതി സുഹൈല് സജീവ് ബോസ്റ്റല് സ്കൂളില് നിന്നും ജാമ്യത്തിലിറങ്ങി. ഒക്ടോബര് 11ന് പിടിയിലായ സുഹൈല്, ഒരു മാസവും അഞ്ച് ദിവസവും ബോസ്റ്റല് സ്കൂളില് കഴിഞ്ഞ ശേഷമാണ് ഇപ്പോള് പുറത്തിറങ്ങുന്നത്. പുറത്തിറങ്ങിയ സുഹൈലിന്റെ ദൃശ്യങ്ങള് മാധ്യമങ്ങളുടെ ക്യാമറയില് പതിയുന്നത് തടയാന് ബന്ധുക്കളും സുഹൃത്തുക്കളും ചേര്ന്ന് മാധ്യമപ്രവര്ത്തകരെ തട്ടിമാറ്റുകയും സുഹൈലിനെ തിടുക്കപ്പെട്ട് കാറിലേക്ക് കയറ്റിക്കൊണ്ടുപോവുകയും ചെയ്തു.
മജിസ്ട്രേറ്റ് കോടതിയും ജില്ലാ കോടതിയും നേരത്തെ ജാമ്യാപേക്ഷ തള്ളിയിരുന്നെങ്കിലും, പ്രതികള് ഹൈക്കോടതിയെ സമീപിച്ചതോടെയാണ് ജാമ്യം ലഭിച്ചത്. കേസിലെ രണ്ട്, മൂന്ന്, നാല് പ്രതികള് നേരത്തെ പുറത്തിറങ്ങിയിരുന്നു. എന്നാല് സുഹൈല് സജീവിന്റെ മോചനം പത്ത് ദിവസത്തേക്ക് കൂടി നീട്ടിവെക്കാന് ഹൈക്കോടതി നിര്ദ്ദേശിക്കുകയായിരുന്നു.
https://www.facebook.com/Malayalivartha

























