അന്യസംസ്ഥാനക്കാരനായ കാലില്ലാത്ത ഭിക്ഷാടകനാണ് ഇത്തവണ കേരള സര്‍ക്കാരിന്റെ അക്ഷയലോട്ടറിയില്‍ 65 ലക്ഷത്തിന്റെ ഭാഗ്യസമ്മാനം നേടിയത്. ആന്ധ്രാപ്രദേശിലെ അനന്തപൂര്‍ ജില്ലയിലെ കൊരപ്പാട് ഗ്രാമത്തിലെ പെന്നയ്യ എന്ന 32 കാരനായ വികലാംഗനെയാണ് ഭാഗ്യദേവത ഇത്തവണ കടാക്ഷിച്ചത്.

ഇയാള്‍ പനച്ചമൂട്ടിലെ അല്‍സിയ ഏജന്‍സിയില്‍ നിന്നും എടുത്ത പത്തു ടിക്കറ്റുകളില്‍ ഒന്നിനാണ് ഭാഗ്യം അടിച്ചത്. വെളളറട, മാര്‍ത്താണ്ഡം ഭാഗത്ത് ഭിക്ഷ യാചിച്ചും ബസ് സ്റ്റാന്റിലും കടത്തിണ്ണയിലുമൊക്കെയായി കിടന്നുറങ്ങിയും കഴിഞ്ഞിരുന്ന പെന്നയ്യ അഞ്ചംഗ കുടുംബത്തിന്റെ ആശ്രയമായിരുന്നു. ഭിക്ഷയാചിച്ച് കിട്ടുന്ന തുകയില്‍ നല്ല ഭാഗം കുടുംബ ചെലവുകള്‍ക്കും ഒരു ഭാഗം ലോട്ടറിക്കായും നീക്കി വെക്കുകയും പതിവായിരുന്നു.

ഇന്റര്‍നെറ്റില്‍ ഫലം അറിഞ്ഞപ്പോള്‍ തന്നെ ലോട്ടറി ഏജന്‍സി ഉടമ വിവരം പെന്നയ്യയെ അറിയിച്ചു. തുടര്‍ന്ന് വെള്ളറട പോലീസ് എത്തി പെന്നയ്യക്ക് സംരക്ഷണവും നല്‍കി. അന്യനാട്ടുകാരന്‍ എന്ന നിലയില്‍ മതിയായ രേഖകള്‍ ഇല്ലാത്തതിനാല്‍ ലോട്ടറി ഏറ്റെടുക്കാന്‍ ബാങ്കുകള്‍ തയ്യാറായിട്ടില്ല എന്നതിനാല്‍ പെന്നയ്യയെ പോലീസ് സ്‌റ്റേഷനില്‍ തന്നെ പാര്‍പ്പിച്ചിരിക്കുകയാണ്. കഴിഞ്ഞദിവസം എടുത്ത എകെ 651665 എന്ന നമ്പറിലായിരുന്നു ഭാഗ്യം വന്നത്.

ആന്ധ്രയില്‍ പാറമടത്തൊഴിലാളിയായിരിക്കെ ഉണ്ടായ അപകടത്തില്‍ പെന്നയ്യയുടെ രണ്ടു കാലുകളും നഷ്ടമാകുകയായിരുന്നു. പിന്നീട് കൃത്രിമ പഌസ്റ്റിക് കാലുകളുടേയും ക്രച്ചസിന്റെയും സഹായത്താലാണ് ഇയാള്‍ കാര്യങ്ങള്‍ ചെയ്തിരുന്നത്.തുടര്‍ന്ന് ഭാര്യ രാജന്‍ജിനമ്മ മക്കളായ സ്‌നേഹലത, അഭിവര്‍ദ്ധന്‍, നരസിംഹം എന്നിവരെ പോറ്റാന്‍ സ്വന്തം നാട്ടില്‍ നിന്നും മറ്റൊരു നാട്ടിലെത്തി ഭിക്ഷയെടുക്കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha