വര്‍ക്കല ശിവപ്രസാദ് വധക്കേസില്‍ ഡിഎച്ച്ആര്‍എം സംസ്ഥാന നേതാക്കളടക്കം ഏഴു പേര്‍ക്കും ജീവപര്യന്തം കഠിന തടവ്. തിരുവനന്തപുരം അഡീഷണല്‍ സെഷന്‍സ് ജഡ്ജി ബദറുദ്ദീനാണ് ശിക്ഷ പ്രഖ്യാപിച്ചത്. പ്രതികള്‍ 2,85,000 രൂപ വീതം പിഴയടയ്ക്കണം. ഇതില്‍ ആറുലക്ഷം രൂപ കൊല്ലപ്പെട്ട ശിവപ്രസാദിന്റെ കുടുംബത്തിന് നല്‍കണം. ആക്രമണത്തില്‍ പരിക്കേറ്റ ചായകടക്കാരന്‍ അശോകനു രണ്ടര ലക്ഷം രൂപ നല്‍കാനും കോടതി ഉത്തരവിട്ടു. പിഴ അടച്ചില്ലെങ്കില്‍ ഒരുവര്‍ഷം അധിക തടവ് അനുഭവിക്കണം.

ശിവപ്രസാദ് വധക്കേസില്‍ ഏഴു പ്രതികള്‍ കുറ്റക്കാരാണെന്ന് കോടതി കണ്ടെത്തിയിരുന്നു.
ഡിഎച്ച്ആര്‍എം പ്രവര്‍ത്തകരായ ചെറുന്നിയൂര്‍ സ്വദേശി കെ. ദാസ് (45), പെരുമ്പുഴ സ്വദേശി ജെ. ജയചന്ദ്രന്‍(33), വടശ്ശേരിക്കോണം അംബേദ്കര്‍ കോളനിയില്‍ എസ്. മധു(44), കൊല്ലം മുട്ടക്കാവ് സ്വദേശി എന്‍. സുധി(29), വര്‍ക്കല ചെറുകുന്നം സ്വദേശി എസ്. സുധി(29), ഇലകമണ്‍ സ്വദേശി എസ്. സുനില്‍(34), എറണാകുളം സ്വദേശി വി. ശെല്‍വരാജ് (34) എന്നിവരാണ് കേസിലെ പ്രതികള്‍. പ്രതികളായ പെരുമ്പുഴ സ്വദേശി മുകേഷ്, അയിരൂര്‍ സ്വദേശി സജീവ് എന്നിവര്‍ ഇപ്പോഴും ഒളിവിലാണ്. തെളിവ് നശിപ്പിക്കല്‍, ഗൂഡാലോചന, കലാപത്തിന് ശ്രമം എന്നീ കുറ്റങ്ങളാണ് പ്രതികള്‍ക്കെതിരെ തെളിഞ്ഞത്. കേസില്‍ ആറു പേരെ വെറുതേവിട്ടിരുന്നു.
2009 സെപ്റ്റംബര്‍ 23നു ക്ഷേത്രദര്‍ശനം കഴിഞ്ഞു പ്രഭാത സവാരി നടത്തുകയായിരുന്ന ശിവപ്രസാദിനെ പുലര്‍ച്ചെ അഞ്ചിന് വര്‍ക്കല അയിരൂര്‍ ഗവ.യുപി സ്‌കൂളിനു മുന്‍പില്‍ വെട്ടി കൊലപ്പെടുത്തുകയായിരുന്നു. സമീപത്തു ചായക്കട നടത്തുകയായിരുന്ന അശോകനെ വെട്ടി പരുക്കേല്‍പ്പിക്കുകയും ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha