നിയമസഭാ തിരഞ്ഞെടുപ്പില്‍ 30 മണ്ഡലങ്ങളിലെ കോണ്‍ഗ്രസ് സ്ഥാനാര്‍ഥിപ്പട്ടികയില്‍ ധാരണയായി. പ്രഖ്യാപനം ഉടനുണ്ടാകും. സിറ്റിങ് സീറ്റുകള്‍ക്കൊപ്പം, തര്‍ക്കമില്ലാത്ത സീറ്റുകളിലെ സ്ഥാനാര്‍ഥികളെയും പ്രഖ്യാപിക്കാനാണ് നീക്കം. മുപ്പതിലധികം മണ്ഡലങ്ങളെ ഉള്‍പ്പെടുത്തിയുള്ള ആദ്യഘട്ട പട്ടിക ഫെബ്രുവരി 25 ന് മുന്‍പു പുറത്തിറക്കാനാണ് നേതൃത്വത്തിന്റെ തിരക്കിട്ട ശ്രമം. വട്ടിയൂര്‍ക്കാവില്‍ കെ.മുരളീധരന്‍, തൃത്താലയില്‍ വി.ടി.ബല്‍റാം, മണലൂരില്‍ ടി.എന്‍.പ്രതാപന്‍ എന്നിവര്‍ സ്ഥാനാര്‍ഥിത്വം ഉറപ്പിച്ചു. ഇതു സംബന്ധിച്ച അനൗദ്യോഗിക നിര്‍ദേശം ഇവര്‍ക്കു ലഭിച്ചതായാണ് വിവരം.

പുതുയുഗ യാത്ര കഴിഞ്ഞ് മാര്‍ച്ച് ആറിനു ശേഷമാകും രണ്ടാംഘട്ട സ്ഥാനാര്‍ഥിപ്പട്ടിക പ്രഖ്യാപിക്കുക. തദ്ദേശ തിരഞ്ഞെടുപ്പിലും സ്ഥാനാര്‍ഥികളെ നേരത്തേ തീരുമാനിച്ച് പ്രചാരണം തുടങ്ങിയിരുന്നു. ഇതു വിജയിക്കുകയും ചെയ്തു. സിറ്റിങ് എംഎല്‍എമാര്‍ അല്ലാത്ത ചില മുതിര്‍ന്ന നേതാക്കള്‍ ആദ്യഘട്ട പട്ടികയില്‍ ഉണ്ടാകുമെന്ന് കെ. മുരളീധരന്‍ മനോരമ ഓണ്‍ലൈനോടു സ്ഥിരീകരിച്ചു. വട്ടിയൂര്‍ക്കാവ് മണ്ഡലവും ആദ്യഘട്ട പട്ടികയില്‍ ഉണ്ടാകുമെന്നും അദ്ദേഹം പറഞ്ഞു. തര്‍ക്കമില്ലാത്ത മൂന്നു സീറ്റുകളില്‍ തീരുമാനമായെന്ന് മറ്റൊരു മുതിര്‍ന്ന നേതാവും പറഞ്ഞു. ചില സീറ്റുകളില്‍ കൂടി ചര്‍ച്ച നടക്കുന്നുണ്ട്. തര്‍ക്കമില്ലാത്ത സംവരണ മണ്ഡലങ്ങളിലെയും ചില വനിതാ സ്ഥാനാര്‍ഥികളുടെയും പേരുകള്‍ ആദ്യഘട്ട പട്ടികയിലുണ്ടാകുമെന്നും അദ്ദേഹം പറഞ്ഞു.

വട്ടിയൂര്‍ക്കാവ്, തൃത്താല, മണലൂര്‍ പോലുള്ള മണ്ഡലങ്ങളില്‍ ശക്തമായ മത്സരത്തിനാണു സാധ്യത. ജാഗ്രതയോടെ പ്രവര്‍ത്തിച്ചാല്‍ ഈ സീറ്റുകള്‍ പിടിച്ചെടുക്കാമെന്ന വിശ്വാസം കോണ്‍ഗ്രസിനുണ്ട്. അതിനാലാണ് രണ്ടാംഘട്ടത്തിലേക്കു നീട്ടാതെ സ്ഥാനാര്‍ഥികളെ നേരത്തേ പ്രഖ്യാപിക്കാന്‍ ശ്രമിക്കുന്നത്.

എംപിമാരെ മത്സരിപ്പിക്കുന്ന കാര്യത്തില്‍ അനിശ്ചിതത്വം തുടരുകയാണ്. മത്സരിക്കാനുള്ള താല്‍പര്യം കെ. സുധാകരന്‍ രാഹുല്‍ ഗാന്ധിയെയും കെ.സി. വേണുഗോപാലിനെയും അറിയിച്ചിട്ടുണ്ട്. കോന്നി തിരിച്ചു പിടിക്കാന്‍ അടൂര്‍ പ്രകാശിനെ രംഗത്തിറക്കണമെന്ന അഭിപ്രായം നേതൃനിരയില്‍ പലര്‍ക്കുമുണ്ടെങ്കിലും ഉപതിര!ഞ്ഞെടുപ്പു നടന്നാല്‍ ആറ്റിങ്ങല്‍ ലോക്‌സഭാ മണ്ഡലം കൈവിട്ടു പോകുമോയെന്ന ആശങ്കയുണ്ട്.

സ്ഥാനാര്‍ഥിപ്പട്ടികയില്‍ എംപിമാരെ ഉള്‍പ്പെടുത്താതെയാണ് സുനില്‍ കനഗോലു സര്‍വേഫലം നേതൃത്വത്തിനു കൈമാറിയിരിക്കുന്നത്. ഹൈക്കമാന്‍ഡിന്റേതാകും ഇക്കാര്യത്തില്‍ അന്തിമ തീരുമാനം.