നീറ്റ് ചോദ്യ പേപ്പര് ചോര്ച്ച സംഘടിത അഴിമതിയെന്ന് രാഹുല് ഗാന്ധി
നീറ്റ് യുജി പരീക്ഷാ റദ്ദാക്കിയ നടപടിയില് കേന്ദ്രസര്ക്കാരിനെതിരെ രാഹുല് ഗാന്ധി. വിദ്യാര്ഥികളുടെ കഠിനാധ്വാനത്തെയും, സ്വപ്നങ്ങളുടെയും ബിജെപിയുടെ അഴിമതിഭരണം തകര്ത്തു. യുവാക്കളുടെ ഭാവിയ്ക്കെതിരായ കുറ്റകൃത്യമാണ് നടന്നത്. കുറ്റക്കാരായ മാഫിയ സംഘം എപ്പോഴും രക്ഷപ്പെടുന്നു. വിദ്യാര്ത്ഥികളാണ് ദുരിതമനുഭവിക്കുന്നതെന്നും രാഹുല് ഗാന്ധി ചൂണ്ടിക്കാട്ടി.
പ്രധാനമന്ത്രിയുടെ അമൃതകാലം വിഷകാലമായി മാറി. പണവും സ്വാധീനവുമാണ് ഒരാളുടെ ഭാവി തീരുമാനിക്കുന്നതെങ്കില് വിദ്യാഭ്യാസത്തിന്റെ ആവശ്യമെന്തിനെന്നും രാഹുല് ഗാന്ധി ചോദിച്ചു. ദശലക്ഷക്കണക്കിന് വിദ്യാര്ത്ഥികള് വീണ്ടും മാനസിക സമ്മര്ദ്ദം, സാമ്പത്തിക പ്രതിസന്ധി അടക്കം നേരിടാന് പോകുന്നുവെന്നും രാഹുല് ഗാന്ധി ചൂണ്ടിക്കാട്ടി.
ഇന്ന് രാവിലെയാണ് ചോദ്യപ്പേപ്പര് ക്രമക്കേട് കാരണം ഈ വര്ഷത്തെ നീറ്റ് യു ജി മെഡിക്കല് പ്രവേശന പരീക്ഷ റദ്ദാക്കിയത്. മെയ് 3 ന് നടന്ന പരീക്ഷയുടെ ചോദ്യപ്പേപ്പര് ചോര്ന്നുവെന്ന് വ്യക്തമായതോടെയാണ് തീരുമാനമെന്ന് അധികൃതര് അറിയിച്ചു. മെഡിക്കല് പ്രവേശനത്തിനായി വീണ്ടും പരീക്ഷ നടത്തും. ഇതിനായി വിജ്ഞാപനം ഇറക്കും. പുതിയ ഹാള്ടിക്കറ്റ് ഉടന് കുട്ടികള്ക്ക് വിതരണം ചെയ്യുമെന്ന് അധികൃതര് അറിയിച്ചു.
പുതിയ രജിസ്ട്രേഷനും ഫീസും വേണ്ട. ഒരിക്കല് പരീക്ഷയെഴുതിയതിനാല് പുതുതായി രജിസ്ട്രേഷന് നടത്തേണ്ടതിന്റേയോ ഫീസ് അടയ്ക്കേണ്ടതിന്റെയോ ആവശ്യമില്ലെന്നും നാഷണല് ടെസ്റ്റിംഗ് ഏജന്സി വ്യക്തമാക്കി. പരീക്ഷാ സംവിധാനത്തിലുള്ള വിശ്വാസം വീണ്ടെടുക്കുന്നതിന് വേണ്ടി കൂടിയാണ് പുനഃപരീക്ഷ നടത്തുന്നതെന്ന് സര്ക്കാര് പ്രഖ്യാപിച്ചു.
https://www.facebook.com/Malayalivartha
