ഈ മാസം മൂന്നിന് നടന്ന നീറ്റ് യു ജി പരീക്ഷ റദ്ദാക്കി. ചോദ്യപ്പേപ്പർ ചോർന്നു എന്ന ആരോപണം ഉയർന്നതിന് പിന്നാലെയാണ് നടപടി. പരീക്ഷ വീണ്ടും നടത്താനാണ് തീരുമാനം. പുതിയ തീയതി ഉടൻ പ്രഖ്യാപിക്കും.

അതേസമയം പരീക്ഷയ്ക്കു മുൻപു പ്രചരിച്ച മാതൃകാ ചോദ്യക്കടലാസിലെ 135 ചോദ്യങ്ങൾ യഥാർഥ പരീക്ഷയിൽ ഉൾപ്പെട്ടിരുന്നുവെന്നായിരുന്നു ആരോപണം ഉയർന്നത്.

പരീക്ഷയ്ക്ക് മുന്നോടിയായി പ്രചരിച്ച 'സാധ്യതാ ചോദ്യപേപ്പറിലെ' ഭൂരിഭാഗം ചോദ്യങ്ങളും യഥാർഥ പരീക്ഷയിലേതാണെന്ന് വ്യക്തമായതോടെയാണ് നടപടി കർശനമാക്കിയത്.

ഇതിൽ കെമിസ്ട്രി വിഭാഗത്തിലെ 120ഓളം ചോദ്യങ്ങൾ അതേപടി പുറത്തുവന്നു. 720ൽ 600 മാർക്കിന്റെ ചോദ്യങ്ങളും ചോർന്നത് പരീക്ഷയുടെ വിശ്വാസ്യതയെത്തന്നെ ബാധിക്കുകയും ചെയ്തു.
സംഭവവുമായി ബന്ധപ്പെട്ട് രാജസ്ഥാനിലെ സിക്കർ, ഡെറാഡൂൺ എന്നിവിടങ്ങളിൽ നിന്നായി 13 പേരെ രാജസ്ഥാൻ പൊലീസ് സ്പെഷ്യൽ ഓപ്പറേഷൻസ് ഗ്രൂപ്പ് ഇതിനോടകം കസ്റ്റഡിയിലെടുത്തിട്ടുണ്ട്. പരീക്ഷാ ക്രമക്കേടുകളെക്കുറിച്ചുള്ള അന്വേഷണം കേന്ദ്ര സർക്കാർ സിബിഐക്ക് കൈമാറി. റദ്ദാക്കിയ പരീക്ഷ വീണ്ടും നടത്താൻ നാഷണൽ ടെസ്റ്റിങ് ഏജൻസി (എൻടിഎ) തീരുമാനിച്ചെങ്കിലും പുതുക്കിയ തീയതി ഇതുവരെ പ്രഖ്യാപിച്ചിട്ടില്ല.