നീറ്റ് ചോര്ച്ചയില് ബിഎഎംഎസ് വിദ്യാര്ഥി അറസ്റ്റില്
നീറ്റ് ചോദ്യപ്പേപ്പര് ചോര്ച്ചയുമായി ബന്ധപ്പെട്ട് ബാച്ചിലര് ഓഫ് ആയുര്വേദിക് മെഡിസിന് ആന്ഡ് സര്ജറി (ബിഎഎംഎസ്) വിദ്യാര്ഥി അറസ്റ്റിലായി. ശുഭം ഖൈര്നറെന്ന മുപ്പതുകാരനാണ് നാസിക് ക്രൈംബ്രാഞ്ചിന്റെ പിടിയിലായത്. ടെലഗ്രാമില്നിന്ന് 10 ലക്ഷം രൂപയ്ക്ക് വാങ്ങിയ നീറ്റ് പരീക്ഷയുടെ മാതൃകാ ചോദ്യപ്പേപ്പര് ഇയാള് 15 ലക്ഷം രൂപയ്ക്ക് ഹരിയാനയില് നിന്നുള്ള മറ്റൊരാള്ക്ക് മറിച്ചുവിറ്റെന്നും അന്വേഷണ ഉദ്യോഗസ്ഥര് പറഞ്ഞു. ഇതുവരെ 45ലേറെപ്പേരാണ് ചോദ്യപ്പേപ്പര് ചോര്ച്ചയുമായി ബന്ധപ്പെട്ട് അറസ്റ്റിലായത്.
ചോദ്യപ്പേപ്പര് ചോര്ന്ന സംഭവത്തില് സിബിഐ എഫ്ഐആറിട്ട് അന്വേഷണം ആരംഭിച്ചിട്ടുണ്ട്. നാല് സംഘമായി തിരിഞ്ഞാണ് അന്വേഷണം. അതേസമയം, കേസുമായി സഹകരിക്കുന്ന രാജസ്ഥാന് പൊലീസിന്റെ സ്പെഷല് ഓപ്പറേഷന്സ് ഗ്രൂപ്പും നാസിക് പൊലീസും വ്യത്യസ്ത നിഗമനങ്ങളാണ് പങ്കുവയ്ക്കുന്നത്. ചോദ്യപ്പേപ്പര് പ്രിന്റ് ചെയ്ത നാസിക്കിലെ പ്രസില് നിന്നാകാം ചോദ്യപ്പേപ്പര് ചോര്ന്നതെന്ന് രാജസ്ഥാന് എസ്ഒജി പറയുന്നു. എന്നാല് ടെലഗ്രാം ആപ്പില്നിന്നാണ് നാസിക്കിലെ വിദ്യാര്ഥികള്ക്ക് ചോദ്യപ്പേപ്പര് ലഭിച്ചതെന്നും പുണെയിലെ വിദ്യാര്ഥികളാണ് നാസിക്കിലേക്ക് പേപ്പര് കൈമാറിയതെന്നുമാണ് നാസിക് പൊലീസിന്റെ കണ്ടെത്തല്. രാജസ്ഥാനിലെ കോട്ടയ്ക്ക് സമാനമായി മല്സരപരീക്ഷാ പരിശീലനത്തിന്റെ കേന്ദ്രമായി മാറിയ ഇടമായ സീക്കറാണ് നീറ്റ് ചോദ്യപ്പേപ്പര് ചോര്ച്ചയുടെ മുഖ്യകേന്ദ്രങ്ങളിലൊന്ന്. സീക്കറില്നിന്നാണ് ചോദ്യപ്പേപ്പര് ചോര്ന്ന വിവരം നാഷണല് ടെസ്റ്റിങ് ഏജന്സിക്കും പൊലീസിനും ലഭിച്ചത്.
അവസാന വര്ഷ ബിഎഎംഎസ് വിദ്യാര്ഥിയായ ശുഭം ഖൈര്നര്ക്ക് 120 ചോദ്യങ്ങള് അടങ്ങിയ നീറ്റ് പരീക്ഷയുടെ മാതൃകാ ചോദ്യപ്പേപ്പര് ലഭിച്ചു. അയാള് ഇതിന്റെ സോഫ്റ്റ് കോപ്പി വാട്സാപ്പിലൂടെ ഹരിയാനയിലെ ഗുരുഗ്രാമിലുള്ള ഒരു വിദ്യാര്ഥിക്ക് കൈമാറി. അവിടെനിന്നും ചോദ്യപ്പേര് രാജസ്ഥാന്, കേരളം, ഉത്തരാഖണ്ഡ്, ജമ്മുകശ്മീര്, ബിഹാര് തുടങ്ങിയ സ്ഥലങ്ങളിലെ വിദ്യാര്ഥികളിലേക്ക് പ്രചരിച്ചു. ഇക്കൂട്ടത്തില് കേരളത്തില് പഠിക്കുന്ന, രാജസ്ഥാനിലെ ചുരു സ്വദേശിയായ വിദ്യാര്ഥിനിക്കും ചോദ്യപ്പേപ്പറിന്റെ സോഫ്റ്റ് കോപ്പി ലഭിച്ചു.
ഈ പെണ്കുട്ടി ചോദ്യപ്പേപ്പര് ചുരുവില് ഹോസ്റ്റല് നടത്തുന്ന തന്റെ പിതാവിന് കൈമാറി. അയാള് അത് തന്റെ ഹോസ്റ്റലിലെ കുട്ടികള്ക്കും സീക്കറിലെ ഒരു കോച്ചിങ് സെന്ററിനും കൈമാറി. ഈ കോച്ചിങ് സെന്ററില്നിന്നാണ് ചോദ്യപ്പേപ്പര് ചോര്ന്നു എന്ന സൂചന എന്ടിഎ അധികൃതര്ക്കും പൊലീസിനും ലഭിച്ചത്. ശേഷം ഏതാനും വിദ്യാര്ഥികളും സീക്കറിലെ കോച്ചിങ് സെന്റര് ജീവനക്കാരും എന്ടിഎയ്ക്ക് പരാതി നല്കി. തുടര്ന്ന് നടത്തിയ അന്വേഷണത്തിനൊടുവില് പരീക്ഷ റദ്ദാക്കുകയായിരുന്നു.
https://www.facebook.com/Malayalivartha
