സംസ്ഥാനത്ത് ഇന്ന് ഉച്ചയ്ക്ക് പ്രഖ്യാപിച്ച മഴ മുന്നറിയിപ്പില്‍ തിരുവനന്തപുരം, കൊല്ലം, കാസര്‍കോട് ജില്ലകളെ പച്ച അലര്‍ട്ടില്‍ നിന്ന് മഞ്ഞ അലര്‍ട്ട് ആയി കേന്ദ്ര കാലാവസ്ഥ വകുപ്പ് ഉയര്‍ത്തി. ഇതോടെ സംസ്ഥാനത്ത് ഇന്ന് ഒമ്പത് ജില്ലകളിലാണ് മഞ്ഞ അലര്‍ട്ടുള്ളത്. ആലപ്പുഴ, എറണാകുളം, തൃശൂര്‍, മലപ്പുറം, വയനാട്, കണ്ണൂര്‍ എന്നീ ജില്ലകള്‍ക്ക് പുറമെയാണ് തിരുവനന്തപുരം, കൊല്ലം, കാസര്‍കോട് ജില്ലകളെ കൂടി മഞ്ഞ അലര്‍ട്ടില്‍ ഉള്‍പ്പെടുത്തിയത്.

ഒറ്റപ്പെട്ട ശക്തമായ മഴയ്ക്കുള്ള സാദ്ധ്യതയാണ് ഈ ജില്ലകളില്‍ പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്ന് പറയുന്നത്. സംസ്ഥാനത്ത് അടുത്ത അഞ്ച് ദിവസം ശക്തമായ മഴ തുടരുമെന്നാണ് കേന്ദ്രകാലാവസ്ഥാ വകുപ്പിന്റെ മുന്നറിയിപ്പ്. പത്തനംതിട്ട, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം ജില്ലകളില്‍ നാളെ മഞ്ഞ അലര്‍ട്ടാണ് പ്രഖ്യാപിച്ചിരിക്കുന്നത്.