ഓപ്പറേഷന്‍ തൂഫാൻ സംസ്ഥാനത്ത് പുരോഗമിക്കുന്നു.സംസ്ഥാന വ്യാപകമായി നടത്തിയ പരിശോധനയില്‍ 171 പേര്‍ അറസ്റ്റിലായി. 151 കേസുകള്‍ രജിസ്റ്റര്‍ ചെയ്തു. രജിസ്റ്റര്‍ ചെയ്ത കേസുകളില്‍ സ്മാള്‍ ക്വാണ്ടിറ്റി കൈവശം വെച്ചതിന് 40 കേസുകളും മീഡിയം ക്വാണ്ടിറ്റി കൈവശം വെച്ചതിന് ആറു കേസുകളും കൊമേഷ്യല്‍ ക്വാണ്ടിറ്റി കൈവശം വെച്ചതിന് നാലു കേസുകളും 27 എൻഡിപിഎസ് പ്രകാരം 101 കേസുകളും കൂടാതെ കോട്പ പ്രകാരം 110 കേസുകളും രജിസ്റ്റര്‍ ചെയ്തിട്ടുണ്ട്.

ഇവരില്‍ നിന്ന് 56.380 ഗ്രാം എം.ഡി.എം.എയും 32.472 കി.ഗ്രാം കഞ്ചാവും 95.1 ഗ്രാം ഹാഷിഷ് ഓയിലും 6.94 ഗ്രാം മെത്താംഫെറ്റമിനും 3.65 ഗ്രാം കഞ്ചാവ് ഓയിലും മൂന്ന് കഞ്ചാവ് ചെടികളും പിടിച്ചെടുത്തു.ഓപ്പറേഷന്‍ തൂഫാന്‍റെ ഭാഗമായി ഇതുവരെ 5580 കേസുകളാണ് രജിസ്റ്റര്‍ ചെയ്തത്. ആകെ 5983 അറസ്റ്റുകള്‍ നടന്നു.

ഓപ്പറേഷന്‍ തൂഫാന്‍റെ ഭാഗമായി ഇന്നലെ മാത്രം സംസ്ഥാനത്തുടനീളം കേരള പോലീസ് 84 ബോധവല്‍ക്കരണ ക്ലാസുകള്‍ നടത്തി. ഇതുവരെ നടത്തിയ ആകെ ബോധവല്‍ക്കരണ ക്ലാസ്സുകളുടെ എണ്ണം 6296 ഉം കൗണ്‍സിലിങ്ങുകളുടെ എണ്ണം 293 ഉം ആണ്. സ്കൂള്‍, കോളേജ് പ്രൊട്ടക്ഷന്‍ ഗ്രൂപ്പുകളുടെ നേതൃത്വത്തില്‍ ആകെ 5222 ബോധവത്ക്കരണ പരിപാടികളും നടത്തി.

ലഹരി വിപണനത്തെക്കുറിച്ചുള്ള വിവരങ്ങള്‍ പൊതുജനങ്ങള്‍ക്ക് നേരിട്ടും (9497979794, 9497927797) വാട്സ്ആപ്പ് (9995966666) മുഖേനയും പോലീസിനെ അറിയിക്കാം. ഈ നമ്പറുകളിലേക്ക് ബന്ധപ്പെടുന്നവരുടെ വിവരങ്ങള്‍ രഹസ്യമായി സൂക്ഷിക്കും.