സുഹൃത്തുക്കളോടൊപ്പം പുഴയിൽ ഇറങ്ങിയ യുവാവിനെ ഒഴുക്കിൽപ്പെട്ട് കാണാതായി. കോഴിക്കോട് എകരൂൽ സ്വദേശി ഷിജുവിനെയാണ് പൂനൂർ പുഴയിൽ കാണാതായത്. ഇന്നലെ വൈകിട്ട് അഞ്ചുമണിയോടെ കാവുള്ളപറമ്പ് കടവിലാണ് സംഭവം.

കോൺക്രീറ്റ് ജോലിക്കാരനായ ഷിജു മൂന്ന് സുഹൃത്തുക്കൾക്കൊപ്പമാണ് പുഴയിൽ കുളിക്കാനായി ഇറങ്ങിയതെന്നാണ് പ്രാഥമിക സൂചനകളുള്ളത്. യുവാവ് ഒഴുക്കിൽപ്പെട്ടതിനെ തുടർന്ന് കൂടെയുണ്ടായിരുന്നവർ ബഹളം വെച്ചതോടെയാണ് നാട്ടുകാർ വിവരമറിയുന്നത്.

അതേ തുടർന്ന് ഉടൻ തന്നെ നരിക്കുനി അഗ്നിരക്ഷാനിലയത്തിലെ ഓഫീസർ കെ പ്രദീപിന്റെ നേതൃത്വത്തിലുള്ള ഫയർ ഫോഴ്‌സ് സംഘം സ്ഥലത്തെത്തി. ഇവരോടൊപ്പം നാട്ടുകാരും സിവിൽ ഡിഫൻസ് വളണ്ടിയർമാരും തെരച്ചിൽ തുടരുന്നു.