കേരള സര്ക്കാര് നടത്തിയ മെഡിക്കല് പ്രവേശനപ്പരീക്ഷ റദ്ദായി; ഏകീകൃത പരീക്ഷ ഈ വര്ഷംതന്നെ നടത്തണമെന്നു സുപ്രീം കോടതി
ഏകീകൃത പരീക്ഷ ഈ വര്ഷംതന്നെ നടത്താന് സുപ്രീം കോടതി അനുമതി നല്കി. ഇതോടെ കഴിഞ്ഞദിവസം സംസ്ഥാന മെഡിക്കല് പ്രവേശന പരീക്ഷയെഴുതിയ വിദ്യാര്ഥികള് എന്ഇഇടി(നീറ്റ്) പരീക്ഷ എഴുതണം. രണ്ടുഘട്ടങ്ങളിലായായിരിക്കും പരീക്ഷ നടത്തുക. ജസ്റ്റിസ് അനില് ആര്.ദവേ അദ്ധ്യക്ഷനായ മൂന്നംഗ ബെഞ്ചാണ് നീറ്റ് പരീക്ഷ ഈവര്ഷം തന്നെ നടത്താന് അനുമതി നല്കിയത്.
മേയ് ഒന്നിനും ജൂലൈ പതിനാലും പരീക്ഷ നടത്താനാണു തീരുമാനം. ഓഗസ്റ്റ് പതിനേഴിന് ഫലം പ്രഖ്യാപിക്കും. എം.ബി.ബി.എസ്, ബി.ഡി.എസ് പ്രവേശനത്തിന് ഈ അദ്ധ്യയന വര്ഷം തന്നെ ഏകീകൃത പൊതു പ്രവേശന പരീക്ഷ (നീറ്റ്) നടത്താന് തയ്യാറാണെന്ന് കേന്ദ്ര സര്ക്കാരും മെഡിക്കല് കൗണ്സില് ഒഫ് ഇന്ത്യയും സുപ്രീം കോടതിയെ അറിയിച്ചിരുന്നു. പരീക്ഷയുടെ സമയക്രമം ഉള്പ്പെടെയുള്ള വിശദാംശങ്ങള് ഇന്ന് നേരിട്ട് ഹാജരാക്കുമെന്നും സി.ബി.എസ്.ഇ കോടതിയില് വ്യക്തമാക്കിയിരുന്നു. മെഡിക്കല് കോളേജുകളിലെ പ്രവേശനത്തിനുള്ള അന്തിമ തീയതി സെപ്തംബര് 30 ആയതിനാല് പൊതുപരീക്ഷ നടത്താന് ആവശ്യമായ സമയമുണ്ടെന്നും സിബിഎസ്ഇ അറിയിച്ചിരുന്നു.സര്ക്കാര്, സ്വകാര്യ മെഡിക്കല് കോളേജുകളിലേക്കുള്ള എം.ബി.ബി.എസ്, ബി.ഡി.എസ് പ്രവേശനത്തിന് ഏകീകൃത പൊതു പ്രവേശന പരീക്ഷ വേണ്ടെന്ന മുന് ഉത്തരവ് ഇക്കഴിഞ്ഞ 11ന് സുപ്രീം കോടതി റദ്ദാക്കിയിരുന്നു. വിഷയം ഒരിക്കല് കൂടി പരിഗണിക്കാനായിരുന്നു കോടതിയുടെ തീരുമാനം. ഈ സാഹചര്യത്തിലാണ് സങ്കല്പ് ചാരിറ്റബിള് ട്രസ്റ്റ് എന്ന സംഘടന നീറ്ര് പരീക്ഷ നടത്താന് നിര്ദ്ദേശിക്കണമെന്ന് ആവശ്യപ്പെട്ട് കോടതിയെ സമീപിച്ചത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
