നവജാത ശിശുക്കളെ വില്പന നടത്തിയ കേസില് അന്വേഷണം തമിഴ്നാട്ടിലേക്കും
കോട്ടയത്തെ തീക്കോയി കേന്ദ്രീകരിച്ച് നവജാത ശിശുക്കളെ വില്പന നടത്തിയ കേസില് നിര്ണായക വിവരങ്ങള് പുറത്ത്. കഴിഞ്ഞ ആറുമാസത്തിനുള്ളില് ഒരു കുട്ടിയെ ഈ സംഘം വിറ്റതായാണ് പോലീസ് ഇപ്പോള് കണ്ടെത്തിയിട്ടുള്ളത്. ഈ സംഘം നവജാത ശിശുക്കളെ വില്പന നടത്തിയിരുന്നതായി പോലീസ് സ്ഥിരീകരിച്ചു. ഇതിന്റെ അടിസ്ഥാനത്തില് പുതിയ എഫ്ഐആര് രജിസ്റ്റര് ചെയ്ത് അന്വേഷണം ഊര്ജ്ജിതമാക്കാനാണ് പോലീസിന്റെ തീരുമാനം. ആര്ക്കാണ് കുട്ടിയെ വിറ്റത്, എപ്പോള്, എവിടെ വെച്ചാണ് കൈമാറ്റം നടന്നത് തുടങ്ങിയ കാര്യങ്ങളില് കൂടുതല് അന്വേഷണം നടക്കേണ്ടതുണ്ട്. പ്രതികളെ ചോദ്യം ചെയ്തതില് നിന്നും കൂടുതല് കേസുകളെക്കുറിച്ചുള്ള വിവരങ്ങള് ലഭിച്ചതായും അന്വേഷണ സംഘം വ്യക്തമാക്കി.
നിലവില് അറസ്റ്റിലായ രണ്ടുപേരില് ഒരാള് തമിഴ്നാട് സ്വദേശിയായതിനാല് അന്വേഷണം കേരളത്തിന് പുറത്തേക്കും വ്യാപിപ്പിക്കാനാണ് പോലീസിന്റെ നീക്കം. അസാം സ്വദേശിനിയായ 22 വയസ്സുകാരി നല്കിയ പരാതിയിലാണ് കേസിന്റെ തുടക്കം. തന്നെ അസമില് നിന്ന് കേരളത്തില് എത്തിച്ച് ഒരു വീട്ടില് താമസിപ്പിച്ചുവെന്നും കുഞ്ഞിനെ നല്കുന്നതിന് എഗ്രിമെന്റില് ഒപ്പുവെക്കുന്നതിന് തടസം പറഞ്ഞപ്പോള് ഉപദ്രവിച്ചു എന്നുമായിരുന്നു ഇവരുടെ പരാതി.
ഒരു റബ്ബര് തോട്ടത്തിന്റെ നടുവിലുള്ള ആ വീട്ടില്നിന്നും ഓടിരക്ഷപ്പെട്ട് റോഡിലെത്തിയ യുവതിയെ നാട്ടുകാരാണ് പോലീസിന്റെ അടുത്തെത്തിച്ചത്. യുവതി നല്കിയ വിവരങ്ങളുടെ അടിസ്ഥാനത്തില് പോലീസ് നടത്തിയ അന്വേഷണത്തിലാണ് ഇതിനുപിന്നില് കുഞ്ഞുങ്ങളെ വില്ക്കുന്ന വലിയൊരു സംഘം തന്നെയുണ്ടെന്ന് പോലീസ് തിരിച്ചറിഞ്ഞത്. നിലവിലുള്ള പരാതിയില് രജിസ്റ്റര് ചെയ്ത എഫ്ഐആറിന് പുറമെ, ശിശുവില്പ്പനയുമായി ബന്ധപ്പെട്ട് പുതിയ കേസ് കൂടി ചാര്ജ് ചെയ്യുമെന്ന് കോട്ടയം ജില്ലാ പോലീസ് മേധാവി മാധ്യമങ്ങളോട് പറഞ്ഞു.
https://www.facebook.com/Malayalivartha
