പുതിയ വന്ദേഭാരത് എക്സ്പ്രസ് സർവീസ് ആരംഭിക്കുന്നു. യശ്വന്ത്പുർ–മംഗളൂരു–മഡ്ഗാവ് റൂട്ടിലുള്ള ട്രെയിൻ പ്രധാനമന്ത്രി നരേന്ദ്ര മോദി നവംബർ 13ന് ഫ്ലാഗ് ഒഫ് ചെയ്യും.

റെയിൽവേ മന്ത്രി അശ്വിനി വൈഷ്ണവും ചടങ്ങിൽ പങ്കെടുക്കും. 12 സ്റ്റോപ്പുകളാണ് ട്രെയിനിനുള്ളത്. ഗോവ-മംഗളൂരു വന്ദേ ഭാരതാണ് ബംഗളൂരുവിലേക്ക് നീട്ടിയത്. നേരത്തെ കോഴിക്കോടേക്ക് നീട്ടുമെന്ന് പറഞ്ഞിരുന്നെങ്കിലും ബംഗളൂരുവിലേക്ക് നീട്ടാൻ കഴിഞ്ഞ മാസമാണ് റെയിൽവേ തീരുമാനിച്ചത്.

മംഗളൂരു വഴിയുള്ള ബംഗളൂരു വന്ദേ ഭാരത് സർവീസ് ഏറെ പ്രയോജനകരമാകുന്നത് ക‍ർണാടകയിലുള്ള മലയാളികൾക്കാണ്. 26655 യശ്വന്ത്പുർ - മഡ്ഗാവ് വന്ദേ ഭാരത് രാവിലെ 7:35ന് യശ്വന്ത്പൂരിൽനിന്ന് പുറപ്പെട്ട്, രാത്രി 8:55ന് ​ഗോവയിലെത്തുന്ന രീതിയിലാണ് ഷെഡ്യൂൾ ചെയ്തിരിക്കുന്നത്.

13 മണിക്കൂർ 20 മിനിറ്റ് കൊണ്ടാകും ട്രെയിൻ സർവീസ് പൂർത്തിയാക്കുക. ബുധനാഴ്ച ഒഴികെ ആഴ്ചയിൽ ആറ് ദിവസവും വന്ദേ ഭാരത് സർവീസ് നടത്തും. നവംബർ 15 മുതലാണ് ട്രെയിനിന്റെ പതിവ് സർവീസ് തുടങ്ങുക.