ശബരിമല എഡിഎം ആയി പുതിയ തസ്തിക രൂപീകരിച്ചു. ദിലീപ് കെ കൈനിക്കാര ഐഎഎസ് ആണ് ശബരിമല എഡിഎം. വരാനിരിക്കുന്ന മണ്ഡല-മകരവിളക്ക് തീർത്ഥാടന കാലം മുന്നിൽക്കണ്ട് ശബരിമലയിലെ വിവിധ വകുപ്പുകളുടെയും ഏജൻസികളുടെയും പ്രവർത്തനങ്ങൾ ഏകോപിപ്പിക്കുകയാണ് പുതിയ തസ്തികകളിലൂടെ സർക്കാരിന്റെ ലക്ഷ്യം.

മണ്ഡലകാല-മകരവിളക്ക് മഹോത്സവ സമയങ്ങളിൽ ശബരിമല, പമ്പ എന്നിവിടങ്ങളിലെ പൂർണ ചുമതല പുതിയ എഡിഎമ്മിനായിരിക്കും. തീർഥാടകർക്കായുള്ള സൗകര്യങ്ങൾ ഉറപ്പാക്കുന്നതിനും സുരക്ഷാ-ഭരണ നിർവഹണ ഏകോപനത്തിനുമാണ് 'അഡീഷണൽ ഡിസ്ട്രിക്റ്റ് മജിസ്ട്രേറ്റ് (ശബരിമല)' എന്ന എക്സ്-കേഡർ തസ്തിക സൃഷ്ടിച്ചത്.

ശബരിമല വികസന അതോറിറ്റി: ആദ്യ യോഗം 11 ന്

ശബരിമല വികസന അതോറിറ്റി രൂപീകരണവുമായും സർക്കാർ മുന്നോട്ട് പോകുകയാണ്. ഇതിനായുള്ള ചർച്ചകൾക്കായി ആദ്യ യോഗം സെപ്റ്റംബർ 11 ന് നടക്കും.

ദേവസ്വം മന്ത്രി കെ.മുരളീധരന്റെ ചേംബറിൽ നടക്കുന്ന യോഗത്തിൽ ദേവസ്വം ബോർഡ് ഉദ്യോഗസ്ഥരും ബന്ധപ്പെട്ട വകുപ്പുകളിലെ ഉദ്യോഗസ്ഥരും പങ്കെടുക്കും. വികസന അതോറിറ്റി യാഥാർഥ്യമാകുന്നതോടെ ശബരിമലയിൽ സർക്കാരിന് കൂടുതൽ നിയന്ത്രണങ്ങൾ ലഭിക്കുകയും ചെയ്യും.

ശബരിമലയുമായി ബന്ധപ്പെട്ട നിർമാണ വികസന പ്രവർത്തനങ്ങൾക്കു മേൽനോട്ടം വഹിക്കുന്നതിനും തീർഥാടനവുമായി ബന്ധപ്പെട്ട വിവിധ വകുപ്പുകളുടെ പ്രവർത്തനം ഏകോപിപ്പിക്കുന്നതിനുമായി കഴിഞ്ഞ സർക്കാരാണ് വികസന അതോറിറ്റി എന്ന ആശയം മുന്നോട്ടുവച്ചത്.

മുഖ്യമന്ത്രി ചെയർമാനും ദേവസ്വം മന്ത്രി വൈസ് ചെയർമാനും ശബരിമലയുമായി ബന്ധപ്പെട്ട വിവിധ വകുപ്പുകളിലെ ഉന്നത ഉദ്യോഗസ്ഥർ അംഗങ്ങളായുമാണ് അതോറിറ്റി രൂപീകരിക്കുന്നത്..