ഏറ്റവും രൂക്ഷമായ വായുമലിനീകരണത്തിൽ മുങ്ങി ഡൽഹി. ദീപാവലി ദിനത്തിൽ പടക്കം പൊട്ടിച്ചതിന്റെ പുകയും കാലാവസ്ഥാ വ്യതിയാനവും ചേർന്നതോടെ പലയിടത്തും ശ്വാസംമുട്ടിക്കുന്ന പുകമഞ്ഞ് രൂപപ്പെട്ടു. ഞായറാഴ്ച വായുനിലവാര സൂചിക (എ.ക്യു.ഐ) 376ലെത്തിയിരുന്നു. 2021നു ശേഷം ദീപാവലി ദിനമുണ്ടാകുവ്വ ഏറ്റവും മോശം വായുനിലവാരമാണിത്.

തിങ്കളാഴ്ച 51 നിരീക്ഷണ കേന്ദ്രങ്ങളിൽ 14 ഇടങ്ങളിൽ വായുനിലവാരം അതീവ ഗുരുതര വിഭാഗത്തിലായിരുന്നു. പുകമഞ്ഞ് കനത്തതോടെ സഫ്ദർജംഗിൽ ദൃശ്യപരിധി 50 മീറ്ററായി കുറഞ്ഞു.ഇന്നലെ കാറ്റിന്റെ വേഗം വർദ്ധിച്ചതോടെ മലിനീകരണത്തിൽ നേരിയ ആശ്വാസമുണ്ടായി. കേന്ദ്ര മലിനീകരണ നിയന്ത്രണ ബോർഡിന്റെ കണക്കനുസരിച്ച് നിലവിൽ നഗരത്തിലെ ശരാശരി എ.ക്യു.ഐ 299 ആണ്.

ഇതോടെ വായുനിലവാരം 'മോശം" വിഭാഗത്തിലെത്തി. എങ്കിലും 57 നിരീക്ഷണ കേന്ദ്രങ്ങളിൽ 23 ഇടങ്ങളിലും 'വളരെ മോശം" വായുനിലവാരം തുടരുകയാണ്. വാഹനങ്ങളിൽനിന്നുള്ള പുക, വ്യവസായശാലകളിലെ മലിനീകരണം, നിർമ്മാണപ്രവർത്തനങ്ങളിലെ പൊടി, അയൽ സംസ്ഥാനങ്ങളിലെ കാർഷിക അവശിഷ്ടങ്ങൾ കത്തിക്കൽ എന്നിവയും പ്രതിസന്ധി രൂക്ഷമാക്കുകയാണ്.