മുഖ്യമന്ത്രി വി ഡി സതീശന്റെ എഐ ഡാന്സ് മെറ്റ നീക്കം ചെയ്തു: വീഡിയോ വ്യക്തിപരമായി വലിയ സന്തോഷമുണ്ടാക്കിയെന്ന് മുഖ്യമന്ത്രി
വൈറലായ തന്റെ എഐ ഡാന്സ് വീഡിയോ വ്യക്തിപരമായി വലിയ സന്തോഷമുണ്ടാക്കിയെന്ന് മുഖ്യമന്ത്രി വി ഡി സതീശന്. അഞ്ച് വയസുള്ള ഒരു കുട്ടി നേരിട്ടെത്തി ഡാന്സ് ഗംഭീരമായിരുന്നുവെന്ന് പറഞ്ഞെന്നും മുഖ്യമന്ത്രി കൂട്ടിച്ചേര്ത്തു.
തിരുവനന്തപുരം ഗവണ്മെന്റ് ലോ കോളേജിലെ ബിരുദദാന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം ഇക്കാര്യം വ്യക്തമാക്കിയത്. വീഡിയോ സന്തോഷം നല്കുന്നുണ്ടെങ്കിലും അതില് ചില നിയമപ്രശ്നങ്ങള് ഉണ്ടെന്നും മുഖ്യമന്ത്രി വ്യക്തമാക്കി. വിവാദ വീഡിയോ മെറ്റ നീക്കം ചെയ്തതിന് പിന്നാലെയാണ് മുഖ്യമന്ത്രിയുടെ പ്രതികരണം. ആര്ട്ടിഫിഷ്യല് ഇന്റലിജന്സിന്റെ (എഐ) അതിവേഗ വളര്ച്ചയ്ക്കൊപ്പം ഉയര്ന്നുവരുന്ന പുതിയ നിയമപ്രശ്നങ്ങളെ അഭിമുഖീകരിക്കാന് പുതിയ തലമുറയിലെ നിയമവിദഗ്ധര് തയാറാകണമെന്നും അദ്ദേഹം പറഞ്ഞു.
സാങ്കേതികവിദ്യ എത്രമാത്രം വികസിച്ചാലും അതിനൊപ്പം പുതിയ നിയമസാദ്ധ്യതകളും വെല്ലുവിളികളും ഉയര്ന്നുവരും. അവ തിരിച്ചറിയാനും നിയമപരമായി കൈകാര്യം ചെയ്യാനും കഴിയുന്ന തരത്തില് നിയമവിദ്യാഭ്യാസം കാലാനുസൃതമായി മാറണമെന്നും അദ്ദേഹം പറഞ്ഞു. ആര്ട്ടിഫിഷ്യല് ഇന്റലിജന്സ്, മെഷീന് ലേണിംഗ്, ക്വാണ്ടം കമ്പ്യൂട്ടിംഗ്, ബയോടെക്നോളജി തുടങ്ങിയ മേഖലകളിലെ വളര്ച്ച നിയമരംഗത്തും വലിയ മാറ്റങ്ങള്ക്ക് വഴിയൊരുക്കുകയാണ്. ആര്ട്ടിഫിഷ്യല് ഇന്റലിജന്സിന്റെ ഉപയോഗം വര്ദ്ധിച്ചതോടെ പകര്പ്പവകാശം, ബൗദ്ധിക സ്വത്തവകാശം തുടങ്ങിയ മേഖലകളില് പുതിയ നിയമപ്രശ്നങ്ങള് ഉയര്ന്നുവരുന്നുണ്ട്. സിനിമാ മേഖലയിലെ പൈറസിയുള്പ്പെടെയുള്ള വിഷയങ്ങളിലും സാങ്കേതികവിദ്യയുമായി ബന്ധപ്പെട്ട നിയമപരമായ വെല്ലുവിളികള് വര്ധിക്കുകയാണെന്നും മുഖ്യമന്ത്രി പറഞ്ഞു.
നിയമബിരുദധാരികള് അഭിഭാഷകവൃത്തിയില് മാത്രം ഒതുങ്ങേണ്ടതില്ല. സര്ക്കാര് സ്ഥാപനങ്ങള്, കോര്പ്പറേറ്റ് സ്ഥാപനങ്ങള് തുടങ്ങി എല്ലാ മേഖലകളിലും നിയമപരിശോധനയും നിയമവിദഗ്ധരുടെ സേവനവും ആവശ്യമാണ്. മാറിവരുന്ന സാങ്കേതിക, സാമൂഹിക സാഹചര്യങ്ങള്ക്കനുസരിച്ച് പുതിയ നിയമമേഖലകളിലേക്ക് നിയമവിദഗ്ധര് കടന്നുവരണം. ഇതിലൂടെ നിയമബിരുദധാരികള്ക്ക് വിപുലമായ തൊഴില്സാധ്യതകള് ലഭിക്കുമെന്നും അദ്ദേഹം പറഞ്ഞു.
നിയമം ഒരു 'ലിവിംഗ് ലോ' ആണ്. കാലത്തിനനുസരിച്ചുള്ള മാറ്റങ്ങള് നിയമങ്ങളിലും ചട്ടങ്ങളിലും ഉണ്ടാകണം. ഭരണഘടനയിലും നിരവധി ഭേദഗതികള് ഉണ്ടായിട്ടുണ്ട്. മാറുന്ന സാമൂഹിക,സാമ്പത്തിക സാഹചര്യങ്ങള്ക്ക് അനുസരിച്ച് കാലഹരണപ്പെട്ട നിയമങ്ങള് പരിഷ്കരിക്കുകയും പുതിയ നിയമനിര്മാണങ്ങള് നടത്തുകയും ചെയ്യേണ്ടത് അനിവാര്യമാണെന്നും മുഖ്യമന്ത്രി പറഞ്ഞു. നിയമവിദ്യാര്ത്ഥികള്ക്ക് ശക്തമായ ഭരണഘടനാപരമായ ബോധം ഉണ്ടായിരിക്കണമെന്നും സംസാരിക്കുമ്പോഴും ചിന്തിക്കുമ്പോഴും പ്രവര്ത്തിക്കുമ്പോഴും നിയമപരവും ഭരണഘടനാപരവുമായ ചട്ടക്കൂട് മനസില് സൂക്ഷിക്കണമെന്നും അദ്ദേഹം ഓര്മിപ്പിച്ചു.
https://www.facebook.com/Malayalivartha
