തൃക്കാക്കര മോര്‍ഫിംഗ് കേസില്‍ പ്രതികളുടെ മൊബൈല്‍ ഫോണുകളില്‍ നിന്ന് പ്രായപൂര്‍ത്തിയാകാത്ത കുട്ടികളുടേതുള്‍പ്പെടെയുള്ള അശ്ലീല ചിത്രങ്ങളും ദൃശ്യങ്ങളും കണ്ടെത്തിയതിനെ തുടര്‍ന്ന് പോക്‌സോ നിയമപ്രകാരവും കേസെടുത്തു. കേസിലെ രണ്ടാം പ്രതി സനീഷ് നടത്തിയിരുന്ന ടെലഗ്രാം പ്രീമിയം ഗ്രൂപ്പുകളെക്കുറിച്ച് ലഭിച്ച വിവരങ്ങളാണ് അന്വേഷണത്തില്‍ വഴിത്തിരിവായത്.

ഝാര്‍ഖണ്ഡില്‍ നിന്നുള്ള ഒരുമൊബൈല്‍ നമ്പറും ടെലഗ്രാം ഗ്രൂപ്പുമായി ബന്ധപ്പെട്ടതായി കണ്ടെത്തി. ഇതോടെയാണ് അന്യസംസ്ഥാനത്തേക്കും അന്വേഷണം വ്യാപിപ്പിച്ചത്. ഈ നമ്പറിന് കേസുമായി നേരിട്ട് ബന്ധമുണ്ടോയെന്നും പൊലീസ് പരിശോധിച്ചുവരികയാണ്. ഝാര്‍ഖണ്ഡ് നമ്പര്‍ ഉപയോഗിച്ചത് കേരളത്തില്‍ നിന്നുള്ള ആരെങ്കിലുമാണോ, സംസ്ഥാനത്തിന് പുറത്തുള്ള മറ്റാര്‍ക്കെങ്കിലും സംഭവത്തില്‍ പങ്കുണ്ടോ, അതോ മറ്റൊരാളുടെ സിം കാര്‍ഡ് ദുരുപയോഗം ചെയ്തതാണോ എന്നിങ്ങനെ വിവിധ സാധ്യതകളാണ് അന്വേഷണ സംഘം പരിശോധിക്കുന്നത്.

കേസില്‍ ആദ്യം ശ്രീഹരിയെയും പിന്നീട് സനീഷിനെയുമാണ് പൊലീസ് അറസ്റ്റ് ചെയ്തത്. കൂടുതല്‍ അശ്ലീല ദൃശ്യങ്ങള്‍ ലഭ്യമാക്കുമെന്ന് വാഗ്ദാനം ചെയ്ത് സനീഷ് ആളുകളെ ടെലഗ്രാം പ്രീമിയം ഗ്രൂപ്പുകളിലേക്ക് എത്തിച്ചിരുന്നതായാണ് പൊലീസ് കണ്ടെത്തിയത്. പണം ഈടാക്കി അംഗത്വം നല്‍കിയ ശേഷം അശ്ലീല ചിത്രങ്ങളും ദൃശ്യങ്ങളും പ്രചരിപ്പിച്ചെന്നാണ് കേസ്.

ഇതിന്റെഅടിസ്ഥാനത്തില്‍ നാല് ടെലഗ്രാം ഗ്രൂപ്പുകള്‍പൊലീസ് വിശദമായി പരിശോധിച്ചുവരികയാണ്. ഗ്രൂപ്പുകളിലെ അഡ്മിന്‍മാരെയും അംഗങ്ങളെയും സംബന്ധിച്ച വിവരങ്ങള്‍ ടെലഗ്രാം അധികൃതരില്‍നിന്ന് അന്വേഷണ സംഘത്തിന് ലഭിച്ചിട്ടുണ്ട്. കേസുമായി ബന്ധപ്പെട്ട കൂടുതല്‍ വിവരങ്ങള്‍ കൈമാറണമെന്ന് ആവശ്യപ്പെട്ട്ഉദ്യോഗസ്ഥര്‍വീണ്ടും ടെലഗ്രാമിന് കത്തയച്ചതായും തൃക്കാക്കര പൊലീസ് അറിയിച്ചു. പുതിയ തെളിവുകളും അന്വേഷണത്തില്‍ ലഭിക്കുന്ന വിവരങ്ങളും വിലയിരുത്തിയ ശേഷമായിരിക്കും തുടര്‍നടപടികള്‍. കേസില്‍ കൂടുതല്‍ ചോദ്യം ചെയ്യലുകളും അറസ്റ്റുകളും ഉണ്ടാകാന്‍ സാധ്യതയുണ്ടെന്ന് പൊലീസ് വ്യക്തമാക്കി.