സ്ക്കൂൾ കലോത്സവത്തിനിടെ അധ്യാപകൻ കുഴഞ്ഞുവീണ് മരിച്ചു. പാലാ ചേർപ്പുങ്കൽ ഹോളിക്രോസ് എച്ച്.എസ്.എസിലെ മലയാളം അധ്യാപകനായ ഇല്ലിക്കൽ മജോ ജോസഫ് (52) ആണ് മരിച്ചത്. കലോത്സവത്തിന്റെ മുഖ്യസംഘാടകനായിരുന്നു മജോ ജോസഫ്.

ഇന്ന് രാവിലെ 11 മണിയോടെയായിരുന്നു അപ്രതീക്ഷിത സംഭവം നടന്നത്. കലോത്സവ പരിപാടികളെക്കുറിച്ച് വേദിയിൽ വിശദീകരണം നൽകിയ ശേഷം വേദിയിൽ നിന്ന് ഇറങ്ങുന്നതിനിടെയാണ് മജോ ജോസഫ് കുഴഞ്ഞുവീണത്.

ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. വിദ്യാർഥികളും അധ്യാപകരും കലോത്സവ പരിപാടികളുമായി സജീവമായി മുന്നോട്ടുപോകുന്നതിനിടെയാണ് അപ്രതീക്ഷിതമായി മജോ ജോസഫ് കുഴഞ്ഞുവീണത്. സംഭവത്തെ തുടർന്ന് സ്കൂൾ സമൂഹത്തിൽ ദുഃഖം പടർന്നു.

മജോ ജോസഫിന്റെ സംസ്കാരം നാളെ വൈകിട്ട് നാലിന് പാലാ സെന്റ് തോമസ് കത്തീഡ്രൽ സെമിത്തേരിയിൽ നടക്കും. ഭാര്യ: മഞ്ജുള ആന്റണി, സെന്റ് മേരീസ് എച്ച്.എസ്., അറക്കുളം അധ്യാപിക. മകൻ: ജെറാർഡ് ജോസഫ്, ബി.വി.എം. കോളജ്, ചേർപ്പുങ്കൽ വിദ്യാർഥി.

സഹോദരങ്ങൾ: സിജോ ജോസഫ്, ഒലവക്കോട് (റെയിൽവേ); സജോ ജോസഫ്, ഇടമറുക്; ശാലിനി പ്രേംജിത്ത്, ഏർത്തയിൽ കുറ്റില്ലം (ഹെഡ് അക്കൗണ്ടന്റ്, കടനാട് പഞ്ചായത്ത്).