എല്ലാത്തിനുമുള്ള മറുപടി ഇന്ന് രമേശ് ചെന്നിത്തല നൽകി .റിപ്പോര്‍ട്ടര്‍ ടിവി ചാനല്‍ ആസ്ഥാനത്ത് പ്രത്യേക അന്വേഷണ സംഘം നടത്തിയ പരിശോധനയില്‍ അന്വേഷണത്തിന് ആവശ്യമായ പ്രധാന തെളിവുകള്‍ ലഭിച്ചിട്ടുണ്ടെന്ന് ആഭ്യന്തരമന്ത്രി രമേശ് ചെന്നിത്തല അറിയിച്ചു. കോടതി ഉത്തരവുപ്രകാരം നിയമപരമായ നടപടികളുമായാണ് എസ്.ഐ.ടി മുന്നോട്ടു പോകുന്നത്. അമേരിക്കന്‍ സന്ദര്‍ശനം പൂര്‍ത്തിയാക്കി തിരിച്ചെത്തിയ ശേഷം തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.എസ്.ഐ.ടിക്ക് പരിശോധനയില്‍ തെളിവുകളൊന്നും ലഭിച്ചില്ലെന്ന പ്രചാരണം തെറ്റാണെന്ന് മന്ത്രി പറഞ്ഞു.

തെളിവുകള്‍ സംബന്ധിച്ച വിശദാംശങ്ങള്‍ അന്വേഷണത്തിന്റെ ഈ ഘട്ടത്തില്‍ പുറത്തുവിടാന്‍ ആകില്ല. തെളിവ് ലഭിച്ചില്ലെന്ന് ആരാണ് പറഞ്ഞതെന്നും, നിയമപരമായ എല്ലാ നടപടിക്രമങ്ങളും പാലിച്ചാണ് അന്വേഷണ സംഘം മുന്നോട്ടുപോകുന്നതെന്നും ആഭ്യന്തരമന്ത്രി വ്യക്തമാക്കി.അന്താരാഷ്ട്ര ഫുട്‌ബോള്‍ താരം ലയണല്‍ മെസ്സിയെ കേരളത്തിലേക്ക് കൊണ്ടുവരാം എന്ന് പറഞ്ഞ് കഴിഞ്ഞ സര്‍ക്കാരിന്റെ കാലത്ത് നടത്തിയ വലിയ തട്ടിപ്പുമായി ബന്ധപ്പെട്ടാണ് ഈ അന്വേഷണം നടക്കുന്നത്. ഇതുമായി ബന്ധപ്പെട്ട കാര്യങ്ങള്‍ വിശദമായി അന്വേഷിക്കണമെന്ന് ആവശ്യപ്പെട്ട്

കായിക മന്ത്രാലയവും കായിക സെക്രട്ടറിയുമാണ് പരാതിയും റിപ്പോര്‍ട്ടും നല്‍കിയത്. കായിക മന്ത്രാലയം നല്‍കിയ കത്ത് പരിശോധിച്ച ശേഷം മുഖ്യമന്ത്രി കേസ് ഫയല്‍ ആഭ്യന്തരവകുപ്പിന് കൈമാറുകയായിരുന്നു.
മുഖ്യമന്ത്രി ഫയല്‍ കൈമാറിയതിനെ തുടര്‍ന്ന് ആഭ്യന്തര വകുപ്പാണ് പ്രത്യേക അന്വേഷണ സംഘത്തെ (എസ്.ഐ.ടി) രൂപീകരിച്ചത്. എ.ഡി.ജി.പി (ലോ ആന്‍ഡ് ഓര്‍ഡര്‍) എച്ച്. വെങ്കിടേഷിന്റെ (വി. വിജയന്‍) നേതൃത്വത്തിലാണ് എസ്.ഐ.ടി സംഘം അന്വേഷണം ആരംഭിച്ചത്.

എസ്.ഐ.ടി സംഘത്തിന് പ്രവര്‍ത്തിക്കാന്‍ കൃത്യമായ നിയമസംവിധാനങ്ങളുണ്ടെന്നും, അവര്‍ നിയമവിരുദ്ധമായി ഒന്നും ചെയ്തിട്ടില്ലെന്നുമാണ് മനസ്സിലാക്കുന്നതെന്നും മന്ത്രി പറഞ്ഞു.നിയമപരമായി കോടതി വാറന്റോട് കൂടിയാണ് എസ്.ഐ.ടി റെയ്ഡ് നടത്തിയത്. ന്യൂസ് റൂമും അഡ്മിനിസ്ട്രേറ്റീവ് ഓഫീസും ഒരേ കെട്ടിടത്തില്‍ തന്നെയാണ് പ്രവര്‍ത്തിച്ചിരുന്നത്. റിപ്പോര്‍ട്ടര്‍ ടിവിയിലെ മാധ്യമപ്രവര്‍ത്തകര്‍ ഇതില്‍ ഭയപ്പെടേണ്ടതില്ലെന്നും, മാധ്യമപ്രവര്‍ത്തനത്തെ തടസ്സപ്പെടുത്തുന്ന രീതിയിലല്ല പോലീസ് ഇടപെട്ടതെന്നും അദ്ദേഹം വ്യക്തമാക്കി.

ഇത് മാധ്യമസ്വാതന്ത്ര്യത്തിനെതിരായ കേസോ നടപടിയോ അല്ലെന്നും, പൊതുജനങ്ങളെയും മാധ്യമങ്ങളെയും അങ്ങനെ തെറ്റിദ്ധരിപ്പിക്കരുതെന്നും ചെന്നിത്തല പറഞ്ഞു.