മറൈന്‍ ഡ്രൈവില്‍ നിന്ന് ഹാജി അലിയിലേക്ക് പോവുകയായിരുന്ന ബിഎംഡബ്ല്യു കാര്‍ കോസ്റ്റല്‍ റോഡില്‍ വച്ച് അപകടത്തില്‍പ്പെട്ട് മൂന്നുപേര്‍ മരിച്ചു. ഒരാള്‍ ഗുരുതരാവസ്ഥയില്‍ ചികിത്സയിലാണ്. ഇന്ന് പുലര്‍ച്ചെ 5.20ഓടെ ലോട്ടസ് ജെട്ടിക്ക് സമീപം ലാലാ കോളേജിന് എതിര്‍വശത്തായിരുന്നു അപകടം.

അമിതവേഗത്തില്‍ പോവുകയായിരുന്ന കാര്‍ ഡ്രൈവര്‍ക്ക് നിയന്ത്രണം നഷ്ടപ്പെട്ടതാണ് അപകടകാരണമെന്നാണ് കോസ്റ്റല്‍ റോഡ് കണ്‍ട്രോള്‍ റൂം വ്യക്തമാക്കിയത്. അമിതവേഗത്തിലെത്തിയ കാര്‍ റോഡിന്റെ ഭിത്തിയില്‍ ഇടിച്ചശേഷം കാര്‍ പാക്കിംഗിനായുള്ള നിര്‍മാണ പ്രവര്‍ത്തനങ്ങള്‍ നടന്നിരുന്ന സ്ഥലത്തേക്ക് പാലത്തില്‍ നിന്ന് താഴേക്ക് പതിക്കുകയായിരുന്നു. അപകടം നടന്നയുടന്‍ കാറിലുണ്ടായിരുന്ന നാലുപേരെയും സമീപത്തുള്ള നായര്‍ ആശുപത്രിയില്‍ എത്തിച്ചപ്പോഴേക്കും മൂന്നുപേര്‍ മരിച്ചിരുന്നു.

ഷനായ് ഗജ്ജല്‍ (21), ധൈര്യ ദര്‍ശന്‍ സേത്ത് (17), ആദിത്യ ജകാസ്‌നിയ (19) എന്നിവരാണ് മരിച്ചത്. ആശുപത്രിയില്‍ എത്തിക്കുന്നതിന് മുമ്പ് തന്നെ ഇവര്‍ മരണപ്പെട്ടിരുന്നതായി ഡോക്ടര്‍മാര്‍ സ്ഥിരീകരിച്ചു. പരിക്കേറ്റ് ഗുരുതരാവസ്ഥയിലായ 23 വയസുകാരനായ ആദിത്യ കല്‍പേഷ്വര്‍ ഓസ്വാളിനെ ട്രോമ വാര്‍ഡില്‍ പ്രവേശിപ്പിച്ചിരിക്കുകയാണ്.