കൊല്ലം പോർട്ട് വികസനത്തെ ഏറ്റവും പ്രാധാന്യത്തോടെ കൂടിയാണ് കാണുന്നതെന്നും വിഴിഞ്ഞത്തിന്റെ സാറ്റലൈറ്റ് പോർട്ടായി കൊല്ലത്തെ വികസിപ്പിക്കുമെന്നും മന്ത്രി ബിന്ദു കൃഷ്ണ . കൊല്ലം പോർട്ട് വികസനവുമായി ബന്ധപ്പെട്ട് പോ‌ർട്ടിൽ നടത്തിയ സന്ദർശനത്തിനു ശേഷം സംസാരിക്കുകയായിരുന്നു മന്ത്രി.

2011-16 കാലയളവിൽ കൊല്ലം പോർട്ടിന്റെ വികസനത്തിന് നിരവധി പദ്ധതികൾ നടപ്പിലാക്കിയിരുന്നു. എന്നാൽ അതിനു ശേഷം പോർട്ടിന്റെ വികസനം സ്തംഭിച്ചിരിക്കുകയായിരുന്നു. കഴിഞ്ഞ 10 വർഷത്തിനിടെ കൊല്ലം പോ‌ർട്ടിന് യാതൊരു പരിഗണനയും ലഭിച്ചിട്ടില്ല. മുഖ്യമന്ത്രി വി ഡി സതീശന്റെ നേതൃത്വത്തിലുള്ള ഈ സർക്കാർ സംസ്ഥാനത്തെ രണ്ട് അന്താരാഷ്ട്ര തുറമുഖങ്ങളുടെയും 18 അനുബന്ധ തുറമുഖങ്ങളുടെയും വികസനത്തെ വളരെ പ്രാധാന്യത്തോടെ കൂടിയാണ് കാണുന്നത്.

ഇതിന്റ ഭാഗമായി കൊല്ലം തുറമുഖത്തിന്റെ വികസനത്തിന് വിവിധ പദ്ധതികൾ സർക്കാർ തയ്യാറാക്കി വരികയാണ്. തൊട്ടടുത്ത ദിവസം തന്നെ തുറമുഖ വകുപ്പുമായി ബന്ധപ്പെട്ട് തിരുവനന്തപുരത്ത് യോഗം ചേരുന്നുണ്ട്. ഇതിനു മുന്നോടിയായി കൊല്ലം പോർട്ടിന്റെ അടിസ്ഥാന സൗകര്യ വികസനത്തിന് ആവശ്യമുള്ള സംഗതികൾ മനസ്സിലാക്കാനും ജനങ്ങളുടെയും പോർട്ട് അധികൃതരുടെയും ജനപ്രതിനിധികളുടെയും അഭിപ്രായങ്ങൾ നേരിട്ട് കേൾക്കാനുമാണ് ഇന്ന് പേർട്ടിൽ സന്ദർശനം നടത്തിയത്. സന്ദർശനത്തിലൂടെ മനസ്സിലാക്കിയ കൊല്ലം തുറമുഖത്തിന്റെ ആവശ്യങ്ങൾ തുറമുഖ വകുപ്പിന്റെയും മുഖ്യമന്ത്രിയുടെയും ശ്രദ്ധയിൽപ്പെടുത്തുമെന്ന് മന്ത്രി പറഞ്ഞു