ഹരിത ഗതാഗതം പ്രോത്സാഹിപ്പിക്കാനും സ്ത്രീകള്‍ക്ക് സുരക്ഷിതവും കുറഞ്ഞ ചെലവിലുള്ളതുമായ യാത്രാ സൗകര്യമൊരുക്കാനുമായി കോഴിക്കോട് കോര്‍പറേഷന്‍ കൊണ്ട് വന്ന സിറ്റി സൈക്കിള്‍ പദ്ധതി വന്‍ പരാജയം. പദ്ധതിക്കായി കൊണ്ടുവന്ന സൈക്കിളുകള്‍ ഷെഡ് നിര്‍മ്മിച്ചു അതിലേക്ക് മാറ്റാത്തതിനാല്‍ സ്വകാര്യ വ്യക്തികളുടെ പറമ്പില്‍ തുരുമ്പെടുത്ത് കിടക്കുകയാണ്. സൈക്കിള്‍ ഷെഡ്ഡ് നിര്‍മ്മിച്ച വാര്‍ഡുകളിലെ സൈക്കിളും ആരും ഉപയോഗിക്കാതെ നശിച്ച നിലയിലാണ്. ഓരോ വാര്‍ഡിലും ഒരു ഷെഡ്.അതില്‍ 12 സൈക്കിളുകള്‍. അതായിരുന്നു ലക്ഷ്യം.

രാവിലെ 7 മുതല്‍ വൈകിട്ട് 7 വരെ സൈക്കിളുകള്‍ വാടകയ്ക്ക് നല്‍കും . ആദ്യ ഒരു മണിക്കൂറിന് 20 രൂപ, രണ്ട് മണിക്കൂറിന് 30 രൂപ, മൂന്ന് മണിക്കൂറിന് 40 രൂപ എന്നിങ്ങനെയായിരുന്നു വാടക. തുടര്‍ന്ന് ഓരോ മണിക്കൂറിനും 15 രൂപ വീതം അധികം ഈടാക്കാനും തീരുമാനിച്ചു.മൊബൈല്‍ ആപ്പും ജി.പി.എസ് സംവിധാനവും ഉള്‍പ്പെടുത്തിയായിരുന്നു പദ്ധതി വിഭാവനം ചെയ്തത്. നടത്തിപ്പ് ചുമതല കുടുംബശ്രീ അംഗങ്ങളെ ഏല്‍പ്പിക്കാനും തീരുമാനിച്ചു. എന്നാല്‍ തുടക്കത്തില്‍ ചില വാര്‍ഡുകളില്‍ ഷെഡ് നിര്‍മ്മിക്കുകയും സൈക്കിളുകള്‍ നല്‍കുകയും ചെയ്തതല്ലാതെ മറ്റൊന്നും നടന്നില്ല.പദ്ധതിക്ക് ആയി കൊണ്ട് വന്ന മറ്റു വാര്‍ഡുകളിലെ സൈക്കിലുകള്‍ പല സ്വകാര്യ വ്യക്തികളുടെ വീടുകളിലും പറമ്പുകളിലും തുരുമ്പ് പിടിച്ചു കിടക്കുകയാണ്. നിര്‍മ്മാണം പൂര്‍ത്തിയായ ഷെഡുകളിലും സമാന അവസ്ഥയാണ്. ആരും ഉപയോഗിക്കാന്‍ എത്താതെ സൈക്കിളുകള്‍ എല്ലാം നശിച്ചു. കാര്യങ്ങള്‍ നോക്കി നടത്താനും ആരുമില്ല.