പ്രമുഖ ഹൃദ്രോഗവിദഗ്ധൻ ഡോ.ജി വിജയരാഘവൻ അന്തരിച്ചു. 84 വയസ്സായിരുന്നു. കാർഡിയോളജി രംഗത്ത് നൂതനമായ പലമാറ്റങ്ങൾക്കും തുടക്കമിട്ട അദ്ദേഹം ഹൃദയത്തിൻറെ കാവൽക്കാരൻ എന്നാണ് അറിയപ്പെടുന്നത്. രാജ്യം പത്മശ്രീ നൽകി ആദരിച്ച ഡോക്ടറുടെ പല പ്രബന്ധങ്ങളും ആഗോള രംഗത്ത് ശ്രദ്ധിക്കപ്പെട്ടതാണ്.

ഹൃദയതാളമറിയാനായി ഡോ വിജയരാഘവന് സ്റ്റെതസ്കോപ്പിൻറെ ആവശ്യം ഇല്ലെന്ന പ്രയോഗം തന്നെയുണ്ട്. പതിറ്റാണ്ടുകളായി ചിരിച്ചുകൊണ്ട് രോഗികളെ നോക്കുന്ന ഡോക്റുടെ ആശ്വാസ കരങ്ങൾ തിരുവനന്തപുരവും കേരളവും രാജ്യവും വൻകരകളും കടന്ന് വ്യാപിച്ചിട്ടുണ്ടായിരുന്നു. രോഗികൾക്ക് ആശ്വാസം ഡോക്ടറുമാരുടെ സംശയങ്ങൾക്ക് മറുപടിയുമായിരുന്നു വിജയരാഘവൻ. രാജ്യത്തെ ആദ്യ 2 ഡി എക്കോ കാർഡിയോഗ്രാഫി ലബോറട്ടറിക്ക് തുടക്കമിട്ടത് അദ്ദേഹമായിരുന്നു.

എൻറോമൈകാർഡിയൽ ഫൈബ്രോസിസിനെ കുറിച്ചുള്ള ഗവേഷണ പ്രബന്ധം ലോകത്തെ ഹൃദ്രോഗ ചികിത്സാരംഗത്തെ നാഴികക്കല്ല്. ഡോപ്ളർ എക്കോ കാർഡിയാഗ്രാഫിയിലെ ലോകത്തെ പ്രഥമ ഗവേഷണ പ്രവർത്തകരിലൊരാൾ. ഇന്ത്യയിലെയും വിദേശത്തെയും കാർഡിയോളജി രംഗത്തെ അറിയപ്പെടുന്ന അധ്യാപകൻ. എംബിബിസ് പൂർത്തിയാക്കിയ തിരുവനന്തപുരം മെ‍ഡിക്കൽ കോളേജിലെ കാർഡിയോളജി വിഭാഗത്തെ ലോകനിലവാരത്തിലേക്ക് ഉയർത്തുന്നതിൽ വഹിച്ചത് നിർണ്ണായക പങ്ക് .

കിംസ് ആശുപത്രിയുടെ സ്ഥാപക ഡയറക്ടറും വൈസ് ചെയർമാനുമായിരുന്നു. സംസ്കൃത പണ്ഡിതനായ സാഹിത്യശിരോമണി എംകെ ഗോവിന്ദൻറെ മകൻ ആഗ്രഹിച്ചത് അധ്യാപകനാകാൻ, പക്ഷെ അച്ഛനുണ്ടായ ഹൃദയാഘാതം ആതുരസേവന മേഖലയിലെക്കെത്തിച്ചു. കേരളത്തിൽ ഹൃദ്രോഗം കൂടുന്നതിനെ കുറിച്ചുള്ള ഡോ വിജയരാഘവൻറെ ഗവേഷണവും ഏറെ ശ്രദ്ധിക്കപ്പെട്ടു.
അതേസമയം ചൊവ്വാഴ്ച രാവിലെ 8 മുതൽ കിംസ് ആശുപത്രിയിൽ പൊതുദർശനം. വൈകുന്നേരം അഞ്ചിന് തൈക്കാട് ശാന്തികവാടത്തിൽ സംസ്കാരം നടക്കും.