ഡ്യൂട്ടി കഴിഞ്ഞ് വീട്ടിലേക്ക് മടങ്ങുകയായിരുന്ന ഇൻഡിഗോ എയർലൈൻസിലെ ക്യാബിൻ ക്രൂ അംഗം ദാരുണമായ വാഹനാപകടത്തിൽ കൊല്ലപ്പെട്ടു. നോയിഡയിലാണ് അപകടം നടന്നത്. ഇൻഡിഗോയിലെ ഫ്ലൈറ്റ് അറ്റൻഡന്റായ കൈനൂർ മിസ്രി (32) ആണ് മരണപ്പെട്ടത്. ജോലി കഴിഞ്ഞുള്ള മടക്കയാത്രയിലാണ് അപകടം സംഭവിച്ചത്.

പുലർച്ചെ ഡ്യൂട്ടി കഴിഞ്ഞ് കമ്പനിയുടെ ഔദ്യോഗിക ക്യാബിൽ വീട്ടിലേക്ക് മടങ്ങുന്നതിനിടെയാണ് വാഹനം അപകടത്തിൽപ്പെട്ടത്. ക്യാബ് മറ്റൊരു വാഹനവുമായി ശക്തമായി കൂട്ടിയിടിക്കുകയായിരുന്നു. അപകടത്തിന്റെ ആഘാതത്തിൽ തലയ്ക്ക് ഗുരുതരമായി പരിക്കേറ്റ കൈനൂർ മിസ്രി സംഭവസ്ഥലത്തു വച്ചുതന്നെ മരണപ്പെട്ടു. ഒറ്റ ഇടിയിൽ തല രണ്ടായി പിളർന്നു. പാതി ജീവനിൽ തുടിച്ച ആ ശരീരം കണ്ട് രക്ഷിക്കാൻ എത്തിയവർ എന്ത് ചെയ്യണമെന്നറിയാതെ സ്തംഭിച്ച് നിൽക്കുകയും ചെയ്തു.

നർത്തകി, മോഡൽ, ട്രാവൽ വ്ലോഗർ എന്നീ നിലകളിലും ഏറെ ശ്രദ്ധേയയായിരുന്ന വ്യക്തിയായിരുന്നു കൊല്ലപ്പെട്ട കൈനൂർ മിസ്രി. വിവരമറിഞ്ഞ് ഉടൻ തന്നെ പോലീസ് സ്ഥലത്തെത്തി പ്രാഥമിക നടപടികൾ സ്വീകരിച്ചു. മൃതദേഹം തുടർന്നുള്ള പോസ്റ്റ്‌മോർട്ടം നടപടികൾക്കായി സമീപത്തെ ആശുപത്രി മോർച്ചറിയിലേക്ക് മാറ്റിയിട്ടുണ്ട്.

സംഭവത്തിൽ പോലീസ് കേസ് രജിസ്റ്റർ ചെയ്ത് വിശദമായ അന്വേഷണം ആരംഭിച്ചിട്ടുണ്ട്. അപകടത്തിനിടയാക്കിയ രണ്ടാമത്തെ വാഹനം അമിതവേഗതയിലായിരുന്നോ അതോ മറ്റെന്തെങ്കിലും കാരണങ്ങളാണോ അപകടത്തിലേക്ക് നയിച്ചതെന്ന് പോലീസ് പരിശോധിച്ചു വരികയാണ്.

കൈനൂർ മിസ്രിയുടെ അപ്രതീക്ഷിത വേർപാടിൽ ഇൻഡിഗോ എയർലൈൻസും സഹപ്രവർത്തകരും അഗാധമായ ദുഃഖം രേഖപ്പെടുത്തി. പ്രിയപ്പെട്ടവളുടെ ദാരുണമായ വേർപാടിൽ ഞെട്ടിത്തരിച്ചിരിക്കുകയാണ് കുടുംബാംഗങ്ങളും സുഹൃത്തുക്കളും.