കോവളത്തെ സ്പായില്‍ 16കാരിയെ ലൈംഗികമായി ഉപദ്രവിച്ച കേസില്‍ കുട്ടിയുടെ ചെറിയമ്മയും ഭര്‍ത്താവും അറസ്റ്റില്‍. ആന്ധ്രയില്‍ നിന്നാണ് ഒളിവിലായിരുന്ന ഇരുവരെയും പിടികൂടിയത്. ഇവരാണ് പെണ്‍കുട്ടിയെ സ്പായില്‍ എത്തിച്ചതെന്ന് പൊലീസ് അറിയിച്ചു. 16കാരിയുടെ അമ്മയുടെ സഹോദരിയാണിത്. പ്രായപൂര്‍ത്തിയായി എന്ന് വരുത്താന്‍ ഇവര്‍ പെണ്‍കുട്ടിയുടെ പേരില്‍ വ്യാജരേഖയുമുണ്ടാക്കി. കേസില്‍ രണ്ടു സ്പാ ഉടമകളെ പൊലീസ് നേരത്തെ പിടികൂടിയിരുന്നു. തിരുവനന്തപുരം നഗരസഭയിലെ ഒരു ഹെല്‍ത്ത് ഇന്‍സ്‌പെക്ടര്‍ക്ക് സ്പാ നടത്തിപ്പുമായി നേരിട്ട് ബന്ധമുണ്ടെന്നതിന് പൊലീസിന് തെളിവ് ലഭിച്ചു. ഒരു സ്പാ ജീവനക്കാരി ഒപ്പം ജോലി ചെയ്തിരുന്ന യുവാവിനോടൊപ്പം ഒളിച്ചോടി പോയിരുന്നു. ആന്ധ്ര സ്വദേശിയായ ഈ പെണ്‍കുട്ടിയെ കോവളം പൊലീസ് കണ്ടെത്തി വിവരങ്ങള്‍ പരിശോധിച്ചപ്പോഴാണ് സ്പായുടെ മറവില്‍ നടന്ന ചൂഷണം പുറത്തുവന്നത്. പെണ്‍കുട്ടി പഠിച്ച സ്‌കൂളില്‍ നിന്നുമുള്ള വിവരം ശേഖരിച്ചപ്പോള്‍ 16 വയസ്സു മാത്രമാണ് പ്രായമെന്ന് വ്യക്തമായി. കൗണ്‍സിലിംഗിലാണ് ബന്ധുക്കളുടെ ക്രൂരതയും സ്പായില്‍ നടന്ന ചൂഷണവും കുട്ടി പറയുന്നത്.

വിഴിഞ്ഞം ചപ്പാത്തിനടത്തുള്ള കേരള ആയുര്‍വേദ, വൈകോര്‍കുളത്തുള്ള ആയുര്‍ കേരള എന്നിവിടങ്ങളിലാണ് പെണ്‍കുട്ടിയെ എത്തിച്ചത്. ഇത് ആയുര്‍വേദ ചികില്‍സാ കേന്ദ്രം ആണെന്നാണ് നാട്ടുകാര്‍ വിചാരിച്ചിരുന്നത് വിശദമായ അന്വേഷണത്തിനൊടുവില്‍ സ്പാ ഉടമകളായ സജിത്ത്, നിഷാന്ത് എന്നിവരെ പൊലീസ് അറസ്റ്റ് ചെയ്തു. നിഷാദിന്റെ അക്കൗണ്ട് പരിശോധനയിലാണ് തിരുവനന്തപുരം നഗരസഭയിലെ ഒരു ഹെല്‍ത്ത് ഇന്‍സ്‌പെക്ടര്‍ക്ക് സ്പാ നടത്തിപ്പുമായി നേരിട്ട് ബന്ധമുണ്ടെന്നതിന് പൊലീസിന് തെളിവ് ലഭിച്ചത്. ഹെല്‍ത്ത് ഇന്‍സ്‌പെക്ടറുടെ ബിനാമി ബിസിനസ്സാണ് ഇതെന്നും സ്പായിലെ സര്‍വീസിന്റെ പണം നല്കാനായി ഇയാളുടെ പേരിലുള്ള സ്‌കാനറാണ് ഉപയോഗിച്ചിരുന്നതെന്നും വ്യക്തമായിട്ടുണ്ട്.