കൊല്ലത്തെ ഇടത് മുന്നണി സ്ഥാനാര്‍ത്ഥി മുകേഷ് സത്യവാങ് മൂലത്തില്‍ യഥാര്‍ത്ഥ വിവരങ്ങള്‍ മറച്ചു വച്ചെന്നാരോപിച്ച് മുന്‍ ഭാര്യ സരിത രംഗത്ത്. തന്റെ പേരില്‍ കേസുകളൊന്നും നിലവിലില്ലെന്നാണ് മുകേഷ് സത്യവാങ് മൂലത്തില്‍ രേഖപ്പെടുത്തിയിരിക്കുന്നത്, എന്നാല്‍ തങ്ങളുടെ കേസ് ഇപ്പോഴും കേരള ഹൈക്കോടതിയില്‍ നിലവിലുണ്ട്. നിയമം പഠിച്ചയാളാണ് മുകേഷ്. പക്ഷേ ആ നിയമം മുകേഷ് കയ്യിലെടുക്കുകയാണ്. 28 വര്‍ഷമായി താന്‍ മിസിസ്. മുകേഷ് തന്നെയാണ്.

മേതില്‍ ദേവികയുടെ പേരാണ് മുകേഷ് തന്റെ സത്യവാങ് മൂലത്തില്‍ ഭാര്യയുടെ സ്ഥാനത്ത് ചേര്‍ത്തിരിക്കുന്നത്. എന്നാല്‍ മുകേഷ് നിയമപരമായി വിവാഹമോചനം നേടിയിട്ടില്ലെന്നും, മേതില്‍ ദേവികയെ വിവാഹം ചെയ്തുവെന്ന വാര്‍ത്ത താനറിയുന്നത് ദൃശ്യമാദ്ധ്യമങ്ങളില്‍ക്കൂടി മാത്രമാണെന്നും സരിത പറയുന്നു. ആശ്രിതരെ സംബന്ധിക്കുന്ന കോളത്തില്‍, ആശ്രിതരില്ല എന്ന തരത്തില്‍ മുകേഷ് രേഖപ്പെടുത്തിയിരിക്കുന്നതും സരിത ചോദ്യം ചെയ്യുന്നു. രണ്ട് ആണ്‍കുട്ടികളുടെ അച്ഛനായ മുകേഷിന് തനിക്ക് ആശ്രിതരാരുമില്ലെന്നു പറയാന്‍ എങ്ങനെ കഴിയുമെന്നും സരിത ചോദിച്ചു.

ക്രൂരനായ ഒരു ഭര്‍ത്താവാണ് മുകേഷ്, ആര്‍ക്കും ദഹിക്കാത്ത യാഥാര്‍ത്ഥ്യങ്ങള്‍ നിറഞ്ഞതാണ് തങ്ങളുടെ ജീവിതമെന്നും സരിത കൂട്ടിച്ചേര്‍ത്തു. നുണയും കഥയും പറഞ്ഞ് ജനങ്ങളെ കയ്യിലെടുക്കാന്‍ മുകേഷ് മിടുക്കനാണ്, പക്ഷേ ആ കഴിവുപയോഗിച്ച് സമൂഹത്തെ സേവിക്കാനാകില്ല. സ്വന്തം കുടുംബത്തിനു നീതി ലഭ്യമാക്കിയിട്ടു വേണം നേതാവാകാന്‍. ഗര്‍ഭിണിയായ ഭാര്യയെപ്പോലും ദേഹോപദ്രവമേല്‍പ്പിച്ച ഒരു ഭര്‍ത്താവാണോ സാമൂഹ്യസേവനം ചെയ്യാന്‍ പോകുന്നതെന്നും സരിത ചോദിക്കുന്നു. മുകേഷിന് ഒരു പാര്‍ട്ടിയുടെയും നേതാവാകാനുള്ള യോഗ്യതയില്ലെന്നും സരിത കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha