അടൂര്‍ പൊലീസ് സ്‌റ്റേഷനില്‍ കോണ്‍ഗ്രസ് ജില്ലാ പഞ്ചായത്തംഗം ശ്രീനാദേവി കുഞ്ഞമ്മയും ജനപ്രതിനിധികളും നടത്തിയ അതിക്രമം ഗൗരവമുള്ള വിഷയമാണെന്ന് ഡിജിപി റവാഡ ചന്ദ്രശേഖര്‍. സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്ന പശ്ചാത്തലത്തില്‍ മാദ്ധ്യമങ്ങളോട് സംസാരിക്കുകയായിരുന്നു ഡിജിപി.

സംഭവത്തില്‍ പത്തനംതിട്ട എസ്പിയോട് റിപ്പോര്‍ട്ട് തേടിയിട്ടുണ്ട്. വീഴ്ച ഗൗരവത്തോടെ അന്വേഷിക്കും. ജനപ്രതിനിധികള്‍ പൊലീസ് സ്‌റ്റേഷനില്‍ വരുന്നത് സ്വാഭാവികമാണ്. അതിനപ്പുറം എന്തെങ്കിലും സംഭവിച്ചോയെന്ന് പരിശോധിക്കുമെന്നും റവാഡ ചന്ദ്രശേഖര്‍ പറഞ്ഞു. സ്‌റ്റേഷന്‍ അതിക്രമത്തില്‍ പൊലീസ് വിശദമായ അന്വേഷണത്തിന് ഒരുങ്ങുകയാണ്. ഡിവൈഎസ്പി തല അന്വേഷണത്തിനാണ് എസ്പി നിര്‍ദേശം നല്‍കിയിരിക്കുന്നത്.

ശ്രീനാദേവിക്കെതിരെ സമൂഹമാദ്ധ്യമങ്ങളിലൂടെ അപകീര്‍ത്തികരമായ പ്രചാരണം നടത്തിയെന്ന പരാതിയില്‍ അറസ്റ്റിലായ യുട്യൂബര്‍ രാജന്‍ ജോസഫിനെ ജൂലായ് 11ന് രാത്രി 10.30ഓടെ സ്‌റ്റേഷനിലെത്തിച്ചപ്പോഴായിരുന്നു സംഭവം. പരാതിക്കാരിയായ ശ്രീനാദേവി കുഞ്ഞമ്മയും പ്രവര്‍ത്തകരും സെല്ലിനുള്ളിലായിരുന്ന രാജന്‍ ജോസഫിനോട് തട്ടിക്കയറുന്നതും സംസാരിക്കുന്നതും സമൂഹമാദ്ധ്യമങ്ങളില്‍ പ്രചരിക്കുന്ന ദൃശ്യങ്ങളില്‍ വ്യക്തമാണ്. കോണ്‍ഗ്രസ് പുറത്താക്കിയ രാഹുല്‍ മാങ്കൂട്ടത്തിന്റെ അനുയായിയായ ഫെനി നൈനാന്‍ ഉള്‍പ്പെടെ സംഘത്തിലുണ്ടായിരുന്നു.