ആസൂത്രണ ബോർഡ് മൂല്യനിർണയത്തിലെ വീഴ്ച സാങ്കേതികം മാത്രമെന്ന് പിഎസ്‍സി ഹൈക്കോടതിയിൽ. വീഴ്ച പരിഹരിച്ചെന്നും പുനർ മൂല്യനിർണയം നടത്തി പരിഹാര നടപടിയെടുത്തുയെന്നും പി എസ് സി കോടതിയെ അറിയിച്ചു. ഒരൊറ്റ പിഴവ് മാത്രമാണുണ്ടായത്. ഉദ്യോഗാർത്ഥി പിഴവ് ചൂണ്ടിക്കാട്ടി. ഉടനെ പിഎസ്‌സി പിഴവ് തിരുത്തി ഷോർട്ട് ലിസ്റ്റ് പുന:പ്രസിദ്ധീകരിച്ചുവെന്നും പി എസ് സി കോടതിയെ അറിയിച്ചു. ഇതോടെ ഒരൊറ്റ പിഴവ് മാത്രമാണെന്നോ എന്ന് കോടതി ആരാഞ്ഞു. അതെയെന്ന് പിഎസ്‌സി മറുപടി നൽകിയതോടെ ആവർത്തിച്ചുള്ള പിഴവുകൾ കേൾക്കുന്നുണ്ടല്ലോ എന്നായി കോടതി.

റാങ്ക് ലിസ്റ്റിൽ ഉൾപ്പെട്ടവർ ഭരണകക്ഷിയുടെ ആളുകളാണെന്ന് പറയുന്നുണ്ടല്ലോ എന്നും കോടതി ചോദിച്ചു. അത്തരം വാദങ്ങൾ ശരിയല്ലെന്നും ഇതെല്ലാം മാധ്യമങ്ങൾ പറയുന്നതാണെന്നുമായിരുന്നു പി എസ് സിയുടെ മറുപടി. മാധ്യമങ്ങൾ പറയുന്നതല്ല യാഥാർഥ്യം.കോടതി അത് കണക്കിലെടുക്കരുതെന്നും പിഎസ്‌സി ആവശ്യപ്പെട്ടു. ക്രൈംബ്രാഞ്ച് അന്വേഷണത്തിന് എതിരായ പിഎസ്‍സിയുടെ ഹർജി പരിഗണിക്കുകയായിരുന്നു ഹൈകോടതി.അതെ സമയം പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട വിവാദങ്ങൾക്കിടെ ഇന്ന് നിർണായക യോഗം ചേരുന്നു.

ചെയർമാൻ എം.ആർ. ബൈജുവിനെതിരെ ഒരു വിഭാഗം അംഗങ്ങൾ യോഗത്തിൽ നിലപാട് കടുപ്പിക്കുമെന്നാണ് സൂചന. സീറോ അവറിൽ ചെയർമാനെതിരെ രൂക്ഷമായ വിമർശനങ്ങൾ ഉയർന്നേക്കും. നേരത്തെ വിഷയത്തിൽ എസ്‌ഐടിക്ക് മുന്നിൽ മൊഴി നൽകിയ പിഎസ്‌സി അംഗങ്ങളാണ് വിമർശനവുമായി രംഗത്തെത്തുക.അതേസമയം, അന്വേഷണത്തിന്റെ ഭാഗമായി പിഎസ്‌സി സെക്രട്ടറി സാജു ജോർജിനെ ക്രൈംബ്രാഞ്ച് ഇന്ന് വീണ്ടും ചോദ്യം ചെയ്യും. കഴിഞ്ഞ ദിവസം നാലുമണിക്കൂറോളം നീണ്ട ചോദ്യം ചെയ്യലിൽ പരീക്ഷാ നടത്തിപ്പും മൂല്യനിർണയ നടപടികളും സംബന്ധിച്ച വിവരങ്ങളാണ് അന്വേഷണസംഘം തേടിയത്.

മുൻ പരീക്ഷാ കൺട്രോളർ കൂടിയായ സെക്രട്ടറിയോട് കൂടുതൽ കാര്യങ്ങൾ ചോദിച്ചറിയാനുണ്ട്. പിഎസ്‌സിയിലെ മുഴുവൻ അംഗങ്ങളെയും വരും ദിവസങ്ങളിൽ ചോദ്യം ചെയ്യാനാണ് അന്വേഷണസംഘത്തിന്റെ നീക്കം. ഇതിന്റെ ഭാഗമായി ഇന്ന് മുതൽ കൂടുതൽ അംഗങ്ങൾക്കും ഉദ്യോഗസ്ഥർക്കും നോട്ടീസ് നൽകും.