തമിഴ്‌നാടിന് സ്വന്തമായി ഒരു സംസ്ഥാന പതാക വേണം! ഇന്ത്യൻ ദേശീയ പതാകയ്ക്ക് തുല്യമായ പ്രാധാന്യത്തോടെ തമിഴിന്റെ അഭിമാനവും സംസ്കാരവും ഉയർത്തിക്കാട്ടുന്ന പതാക വേണമെന്ന ആവശ്യവുമായി വിജയ് സർക്കാരിലെ മന്ത്രി രംഗത്തെത്തിയതോടെ തമിഴ്‌നാട് രാഷ്ട്രീയം പുതിയ വിവാദത്തിലേക്ക്. മുഖ്യമന്ത്രിയായ വിജയ് തന്നെ ആദ്യമായി ഈ പതാക ഉയർത്തണമെന്നും തമിഴ്‌നാട്ടിലെ എല്ലാ വീടുകളിലും പതാക പാറണമെന്നും മന്ത്രിയുടെ പ്രഖ്യാപനം. എന്നാൽ ഈ ആവശ്യത്തിനെതിരെ ബിജെപിയും ഡിഎംകെയും രംഗത്തെത്തിയതോടെ വിഷയം രാഷ്ട്രീയ ചർച്ചയായി മാറിയിരിക്കുകയാണ്.

നവംബർ ഒന്നിന് ചെന്നൈയിൽ നടന്ന തമിഴ്‌നാട് ദിനാഘോഷ ചടങ്ങിലായിരുന്നു പൊതുമരാമത്ത്, കായിക വികസന വകുപ്പ് മന്ത്രി ആധവ് അർജുനയുടെ വിവാദ പ്രസംഗം. നിരവധി സംസ്ഥാനങ്ങൾക്ക് സ്വന്തമായി പതാകയുണ്ടെന്നും തമിഴ്‌നാടിന്റെ ഭാഷാപരവും സാംസ്കാരികവുമായ വ്യക്തിത്വം ഉയർത്തിക്കാട്ടാൻ സംസ്ഥാനത്തിനും ഒരു പതാക വേണമെന്നുമാണ് മന്ത്രി പറഞ്ഞത്. നവംബർ ഒന്നിനും ജൂലൈ 18-നും മുഖ്യമന്ത്രി വിജയ് ഈ പതാക ഉയർത്തണമെന്നും ഓരോ വീട്ടിലും പതാക ഉയർത്തണമെന്നും അദ്ദേഹം ആവശ്യപ്പെട്ടു. ദേശീയ പതാകയ്ക്ക് തുല്യമായ പ്രാധാന്യത്തോടെ തമിഴിന്റെ മഹത്വം വിളിച്ചോതുന്ന പതാകയാണ് വേണ്ടതെന്നും മന്ത്രി വ്യക്തമാക്കി.

എന്നാൽ ഈ പ്രസ്താവനയ്ക്കെതിരെ ബിജെപി ശക്തമായ വിമർശനമാണ് ഉയർത്തിയത്. ബിജെപി നേതാവ് വിനോജ് പി. സെൽവം, തമിഴ് സ്വത്വം നിലനിർത്താൻ പ്രത്യേക പതാകയുടെ ആവശ്യമില്ലെന്ന് പ്രതികരിച്ചു. ഇന്ത്യൻ ത്രിവർണ പതാകയ്ക്ക് കീഴിൽ നിൽക്കുന്നതുകൊണ്ട് തമിഴരുടെ വ്യക്തിത്വത്തിന് ഒരു കുറവും സംഭവിക്കുന്നില്ലെന്നും തമിഴ് സ്വത്വത്തെയും ഇന്ത്യൻ സ്വത്വത്തെയും പരസ്പരം മത്സരിക്കുന്നവയായി അവതരിപ്പിക്കുന്നത് അപകടകരമാണെന്നും അദ്ദേഹം വിമർശിച്ചു. ഇത്തരം പ്രസ്താവനകൾ വിഘടനവാദ മനോഭാവത്തിന് വളംവെക്കുമെന്നായിരുന്നു അദ്ദേഹത്തിന്റെ ആരോപണം.

ബിജെപി മാത്രമല്ല, ഡിഎംകെയും ഈ വിഷയത്തിൽ എതിർപ്പുമായി രംഗത്തെത്തിയിട്ടുണ്ട്. തമിഴ്‌നാട് എന്ന പേര് സംസ്ഥാനത്തിന് ലഭിച്ച ചരിത്രവുമായി ബന്ധപ്പെട്ട ജൂലൈ 18 ആണ് യഥാർത്ഥ തമിഴ്‌നാട് ദിനമായി ആചരിക്കേണ്ടതെന്ന നിലപാടാണ് ഡിഎംകെ മുന്നോട്ടുവെക്കുന്നത്. സംസ്ഥാനത്തിന്റെ ചരിത്രവും ഭാഷാപരമായ സ്വത്വവും ഉയർത്തിക്കാട്ടുന്നതിൽ പതാകയേക്കാൾ പ്രാധാന്യം ചരിത്രപരമായ ദിനങ്ങൾക്കാണെന്ന വാദവും രാഷ്ട്രീയ ചർച്ചകളിൽ ഉയരുന്നുണ്ട്.

എന്നാൽ തമിഴ്‌നാടിന് സ്വന്തമായി പതാക വേണമെന്ന ആവശ്യം ഇന്നും ഇന്നലെയും തുടങ്ങിയതല്ല. ഇതിന് അരനൂറ്റാണ്ടിലേറെ പഴക്കമുള്ള ചരിത്രമുണ്ട്. 1970-ൽ അന്നത്തെ മുഖ്യമന്ത്രി എം. കരുണാനിധിയുടെ നേതൃത്വത്തിലുള്ള ഡിഎംകെ സർക്കാരും തമിഴ്‌നാടിന് പ്രത്യേക സംസ്ഥാന പതാക വേണമെന്ന നിർദേശം മുന്നോട്ടുവെച്ചിരുന്നു. അന്ന് തയ്യാറാക്കിയ മാതൃകയ്ക്ക് ചാരനിറത്തിലുള്ള പശ്ചാത്തലമായിരുന്നു. മുകളിൽ ഇടതുവശത്ത് ഇന്ത്യൻ ദേശീയ പതാകയും പ്രധാന ഭാഗത്ത് തമിഴ്‌നാടിന്റെ ക്ഷേത്രഗോപുര ചിഹ്നവും ഉൾപ്പെടുത്തിയിരുന്നു. കരുണാനിധി ഈ മാതൃക മാധ്യമങ്ങൾക്ക് മുന്നിൽ അവതരിപ്പിക്കുകയും കേന്ദ്രസർക്കാരിന്റെ അനുമതി തേടുകയും ചെയ്തു. എന്നാൽ ആ ശ്രമം യാഥാർഥ്യമായില്ല.

ഇതിനിടെ അയൽസംസ്ഥാനമായ കർണാടകയിലും സംസ്ഥാന പതാകയ്ക്ക് ഔദ്യോഗിക അംഗീകാരം ലഭിക്കണമെന്ന ആവശ്യം വീണ്ടും ചർച്ചയാകുന്നുണ്ട്. കർണാടക മുഖ്യമന്ത്രി ഡി.കെ. ശിവകുമാർ ബെളഗാവി നിയമസഭാ സമ്മേളനവുമായി ബന്ധപ്പെട്ട് ഈ വിഷയം വീണ്ടും പരിഗണിക്കുമെന്ന് വ്യക്തമാക്കിയിട്ടുണ്ട്. 2018-ൽ സിദ്ധരാമയ്യ സർക്കാരിന്റെ കാലത്തും കർണാടകയ്ക്ക് പ്രത്യേക പതാക രൂപകൽപ്പന ചെയ്ത് കേന്ദ്രത്തിന്റെ അംഗീകാരം തേടിയിരുന്നു.

ഇവിടെ ഒരു കാര്യം കൂടി ശ്രദ്ധിക്കേണ്ടതുണ്ട്. ഇന്ത്യൻ ഭരണഘടന സംസ്ഥാനങ്ങൾക്ക് പ്രത്യേക പതാക ഉണ്ടാകുന്നത് വ്യക്തമായി നിരോധിക്കുന്നില്ല. എന്നാൽ ദേശീയ പതാകയുടെ പരമോന്നത ബഹുമാനവും പതാക ഉയർത്തുന്നതുമായി ബന്ധപ്പെട്ട നിയമങ്ങളും മാർഗനിർദേശങ്ങളും പാലിക്കേണ്ടതുണ്ട്. അതുകൊണ്ടുതന്നെ തമിഴ്‌നാടിന്റെ പുതിയ ആവശ്യം രാഷ്ട്രീയത്തിനപ്പുറം നിയമപരമായും ചർച്ച ചെയ്യപ്പെടേണ്ട വിഷയമാണ്.

ഇപ്പോൾ ഉയരുന്ന ചോദ്യം ഇതാണ്. തമിഴ്‌നാടിന് സ്വന്തമായി ഒരു പതാക വേണമെന്നത് ഭാഷയുടെയും സംസ്കാരത്തിന്റെയും അഭിമാനത്തിന്റെ ഭാഗമാണോ? അതോ ദേശീയ ഐക്യത്തെക്കുറിച്ചുള്ള പുതിയ രാഷ്ട്രീയ വിവാദത്തിന് വഴിതുറക്കുന്നതാണോ? അരനൂറ്റാണ്ട് മുമ്പ് കരുണാനിധി മുന്നോട്ടുവെച്ചെങ്കിലും നടപ്പാകാതെ പോയ ആവശ്യം വിജയ് സർക്കാരിന്റെ കാലത്ത് യാഥാർഥ്യമാകുമോ? ഇനി അറിയേണ്ടത് മുഖ്യമന്ത്രിയുടെ നിലപാടാണ്.