സ്വാമിയേ ശരണമയ്യപ്പാ.... കെ.എസ്.ആർ.ടി.സി. ബസുകളിൽ പമ്പവരെയുള്ള ടിക്കറ്റ് കിട്ടണമെങ്കിൽ, ശബരിമല ദർശനത്തിനുവേണ്ടി വെർച്വൽ ക്യൂ ബുക്ക് ചെയ്തതിന്റെ രേഖ കാണിക്കണം. ഇല്ലാത്തവർക്ക് നിലയ്ക്കൽവരെ മാത്രമേ ടിക്കറ്റ് നൽകുകയുള്ളൂ. നിലയ്ക്കലിലെ കൗണ്ടറിൽ നിന്ന് വെർച്വൽ ക്യൂ സ്പോട്ട് ബുക്കിങ് നടത്താവുന്നതാണ്. പമ്പയിൽ ഇത്തവണ സ്പോട്ട് ബുക്കിങ് ഇല്ലാത്തതിനാലാണ് നിലയ്ക്കൽവരെ മാത്രം ടിക്കറ്റ് നൽകാനായി തീരുമാനിച്ചത്.

വെർച്വൽ ക്യൂ ബുക്കിങ് ഇല്ലാതെ പമ്പയിലെത്തുന്നവർക്ക് നിലയ്ക്കലിലേക്ക് തിരികെപ്പോയി സ്പോട്ട് ബുക്കിങ് ചെയ്യേണ്ടിവരും. ഈ ആശയക്കുഴപ്പവും ഇതുവഴിയുണ്ടാകുന്ന തർക്കങ്ങളും ഒഴിവാക്കാൻ പത്തനംതിട്ട ജില്ലാ പോലീസ് മേധാവിയാണ് ഈ നിർദേശം മുന്നോട്ടുെവച്ചത്. കഴിഞ്ഞദിവസം ചേർന്ന ഉന്നതതല യോഗം ഇതംഗീകരിക്കുകയായിരുന്നു.

പമ്പയിലും സന്നിധാനത്തും കാനനപാതയിലും വിവിധ സർക്കാർ വകുപ്പുകളിലെ ഡ്യൂട്ടിക്ക് പോകുന്നവരും താത്‌കാലിക ജോലിക്ക് പോകുന്നവരും പമ്പവരെയുള്ള ടിക്കറ്റ് കിട്ടാൻ അവരവരുടെ ഐ.ഡി.കാർഡുകളോ രേഖകളോ കാണിക്കേണ്ടിവരും. ഇക്കാര്യം കർശനമായി പാലിക്കണമെന്നുകാട്ടി പത്തനംതിട്ട ജില്ലാ ഭരണകൂടം കെ.എസ്.ആർ.ടി.സി. എം.ഡി.ക്ക് കത്തുനൽകും.‌ നടതുറക്കുന്ന തിങ്കളാഴ്ച ഉച്ചയ്ക്ക് 12-നുമുൻപ്‌ നിലയ്ക്കലിൽ നിന്ന് പമ്പയിലേക്ക് തീർത്ഥാടകരെ കൊണ്ടുപോകുന്നതിനുള്ള ബസ് സർവീസുകൾ അനുവദിക്കരുതെന്നും പോലീസ് കെ.എസ്.ആർ.ടി.സി.യോട് ആവശ്യപ്പെട്ടിട്ടുണ്ട്.

ഈ സമയത്തിന് മുമ്പുള്ള യാത്രയ്ക്കായി നിലയ്ക്കൽ വരെയുള്ള ടിക്കറ്റുകൾ മാത്രമേ അനുവദിക്കാവൂയെന്നാണ് പറഞ്ഞിരിക്കുന്നത്. ഈ നിയന്ത്രണം സംബന്ധിച്ച വ്യക്തമായ നിർദേശങ്ങൾ കെ.എസ്.ആർ.ടി.സി.യിലെ ജീവനക്കാർക്കും ബന്ധപ്പെട്ട ഉദ്യോഗസ്ഥർക്കും നൽകുകയും കർശനമായി പാലിക്കുന്നുണ്ടെന്ന് ഉറപ്പുവരുത്തുകയും ചെയ്യണമെന്ന് പോലീസ് ആവശ്യപ്പെട്ടിട്ടുണ്ട്.