നീണ്ട ആവേശ പോരാട്ടത്തിനൊടുവിൽ പാകിസ്താനെ കീഴടക്കി അണ്ടർ 19 ഏഷ്യാ കപ്പ് കിരീടത്തിൽ മുത്തമിട്ട് ഇന്ത്യ. മനസ്സാന്നിധ്യം കൈവിടാതെ മോഹിത് ഉൽവ അവസാന പന്ത് ബൗണ്ടറി കടത്തിയതോടെ ഇന്ത്യ കിരീടം വാനിലേക്കുയർത്തി. ഒരൊറ്റ വിക്കറ്റ് കൈയിലിരിക്കെയായിരുന്നു ഈ നേട്ടം. 338 റൺസ് വിജയലക്ഷ്യവുമായി ബാറ്റിങ്ങിനിറങ്ങിയ ഇന്ത്യയെ മോഹിത് ഉൽവയും സി.വി.എൻ.വി സുഭാഷും ചേർന്ന് അവസാന ഓവറുകളിൽ വിജയത്തിലേക്കെത്തിക്കുകയായിരുന്നു.

മോഹിത് 26 പന്തിൽ 49 റൺസെടുത്തപ്പോൾ എട്ട് പന്തിൽ 11 റൺസായിരുന്നു സുഭാഷിന്റെ സമ്പാദ്യം. 49-ാം ഓവറിൽ ഇരുവരും 17 റൺസ് അടിച്ചെടുക്കുകയും ചെയ്തു. നേരത്തെ ഓപ്പണർമാരായ ലക്ഷ്യ റായ്ചന്ദാനിയും ആര്യവീർ സെവാഗും ഇന്ത്യക്കായി അർധ സെഞ്ചുറി കണ്ടെത്തി. ലക്ഷ്യ 101 പന്തിൽ 80 റൺസെടുത്തപ്പോൾ ആര്യവീർ 61 പന്തിൽ 58 റൺസടിച്ചു. ഇരുവരും ഓപ്പണിങ്ങിൽ 95 റൺസ് കൂട്ടുകെട്ടുണ്ടാക്കി മികച്ച അടിത്തറയാണ് നൽകിയത്.

32 പന്തിൽ 47 റൺസ് അടിച്ച മനാൽ ചൗഹാന്റെ ബാറ്റിങ്ങും നിർണായകമാകുകയും ചെയ്തു. 48-ാം ഓവറിൽ പുറത്താകുന്നതിന് മുമ്പ് മനാൽ, മോഹിതുമായി ചേർന്ന് അർദ്ധ സെഞ്ചുറി കൂട്ടുകെട്ടുണ്ടാക്കി. ഇന്ത്യയെ വിജയത്തിന് തൊട്ടടത്തുവരെ എത്തിച്ചായിരുന്നു മനാൽ മടങ്ങിയത്.