ഇതരജാതിയില്‍പ്പെട്ട യുവാവിനെ പ്രണയിച്ച് വിവാഹം കഴിക്കാനുള്ള തീരുമാനത്തില്‍ ഉറച്ചുനിന്ന 21-കാരിയായ മകളെ കഴുത്തുഞെരിച്ച് കൊലപ്പെടുത്തിയ പിതാവ് അറസ്റ്റില്‍. ഗുജറാത്തിലെ ആനന്ദ് ജില്ലയിലെ ഖംഭാട്ട് താലൂക്കിലുള്ള മേത്പൂര്‍ ഗ്രാമത്തിലാണ് നാടിനെ നടുക്കിയ ഈ ദുരഭിമാനക്കൊല അരങ്ങേറിയത്. കൊമേഴ്‌സ് ബിരുദധാരിയും തുടര്‍പഠനത്തിനായി കോഴ്സ് ചെയ്തുവരികയുമായിരുന്ന സാനിയ എന്ന യുവതിയാണ് കൊല്ലപ്പെട്ടത്. സംഭവത്തില്‍ സാനിയയുടെ പിതാവ് കൗശല്‍കുമാര്‍ പട്ടേലിനെ ഖംഭാട്ട് ടൗണ്‍ പൊലീസ് അറസ്റ്റ് ചെയ്തു.

കഴിഞ്ഞ ഒരു വര്‍ഷമായി അതേ ഗ്രാമത്തിലെ മറ്റൊരു ജാതിയില്‍പ്പെട്ട യുവാവുമായി സാനിയ പ്രണയത്തിലായിരുന്നു. യുവാവിനെ വിവാഹം കഴിക്കണമെന്ന തീരുമാനത്തില്‍ യുവതി ഉറച്ചുനിന്നതോടെ പിതാവ് കൗശല്‍കുമാര്‍ ബന്ധത്തെ ശക്തമായി എതിര്‍ത്തു. ഇരുവരും വ്യത്യസ്ത ജാതിയില്‍പ്പെട്ടവരാണെന്നതും, യുവാവിന് 10,000 മുതല്‍ 15,000 രൂപ വരെ മാത്രമാണ് പ്രതിമാസ വരുമാനമുള്ളതെന്നുമാണ് കൗശല്‍കുമാറിന്റെ എതിര്‍പ്പിന് കാരണമായതെന്ന് ഖംഭാട്ട് ടൗണ്‍ പൊലീസ് ഇന്‍സ്പെക്ടര്‍ പി.ജെ. ബന്ത്വ വ്യക്തമാക്കി.

നവംബര്‍ ഒമ്പതിന് പുലര്‍ച്ചെ 3.15-ഓടെയായിരുന്നു കൊലപാതകം നടന്നത്. സംഭവദിവസം പുലര്‍ച്ചെയും പ്രണയബന്ധത്തില്‍ നിന്ന് പിന്മാറണമെന്ന് കൗശല്‍കുമാര്‍ സാനിയയോട് ആവശ്യപ്പെട്ടിരുന്നു. എന്നാല്‍ ഇതിന് വിസമ്മതിച്ച് യുവതി തന്റെ തീരുമാനത്തില്‍ ഉറച്ചുനിന്നതോടെ പ്രകോപിതനായ പിതാവ് കൃത്യം നടപ്പാക്കുകയായിരുന്നു. വീട്ടിലെ മറ്റ് അംഗങ്ങളെല്ലാം ഉറങ്ങിക്കിടക്കുന്നതിനിടെ അടുക്കളയില്‍ വെച്ച് ഷാള്‍ (ദുപ്പട്ട) ഉപയോഗിച്ച് സാനിയയുടെ കഴുത്തുഞെരിച്ച് കൊലപ്പെടുത്തുകയായിരുന്നുവെന്ന് പൊലീസ് അറിയിച്ചു.

കൊലപാതകത്തിന് ശേഷം സാനിയ ആത്മഹത്യ ചെയ്തതാണെന്ന് വരുത്തിത്തീര്‍ക്കാനായിരുന്നു കുടുംബാംഗങ്ങളുടെ ശ്രമം. ആദ്യഘട്ടത്തില്‍ മകള്‍ ജീവനൊടുക്കിയതാണെന്നാണ് കുടുംബം പൊലീസിനോടും അവകാശപ്പെട്ടത്. എന്നാല്‍ മൃതദേഹം പരിശോധിച്ച സിവില്‍ ആശുപത്രിയിലെ ഡോക്ടര്‍മാര്‍ക്ക് മരണത്തില്‍ സംശയം തോന്നുകയും വിശദമായ പോസ്റ്റ്‌മോര്‍ട്ടം നടത്താന്‍ നിര്‍ദേശിക്കുകയുമായിരുന്നു. തുടര്‍ന്ന് നടന്ന പോസ്റ്റ്‌മോര്‍ട്ടം പരിശോധനയിലാണ് കഴുത്തുഞെരിച്ചാണ് മരണം സംഭവിച്ചതെന്ന് സ്ഥിരീകരിച്ചത്.

പോസ്റ്റ്‌മോര്‍ട്ടം റിപ്പോര്‍ട്ട് പുറത്തുവന്നതോടെ പൊലീസ് അന്വേഷണം ഊര്‍ജിതമാക്കുകയും ചോദ്യം ചെയ്യലില്‍ പിതാവ് കൗശല്‍കുമാര്‍ കുറ്റം സമ്മതിക്കുകയുമായിരുന്നു. തുടര്‍ന്ന് പൊലീസ് ഇയാളെ അറസ്റ്റ് ചെയ്തു. ചൊവ്വാഴ്ച കോടതിയില്‍ ഹാജരാക്കിയ പ്രതിയെ കൂടുതല്‍ ചോദ്യം ചെയ്യുന്നതിനായി കസ്റ്റഡിയില്‍ വിട്ടുകിട്ടണമെന്ന് പൊലീസ് അപേക്ഷ നല്‍കിയെങ്കിലും കോടതി അത് തള്ളുകയും പ്രതിയെ ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്യുകയും ചെയ്തു.