മണ്ഡലകാല തീർത്ഥാടനത്തിനു തുടക്കം കുറിച്ച് ശബരിമലനട നാളെ തുറക്കും. വൈകുന്നേരം 5നു തന്ത്രി കണ്ഠരര് ബ്രഹ്മദത്തന്റെ സാന്നിദ്ധ്യത്തിൽ മേൽശാന്തി ഇ.ഡി.പ്രസാദ് നമ്പൂതിരി നടതുറന്ന് ശ്രീലകത്ത് ദീപം തെളിക്കും. തുടർന്ന് മേൽശാന്തി പതിനെട്ടാംപടി ഇറങ്ങി ഹോമകുണ്ഡത്തിൽ അഗ്നിതെളിക്കും.

നിയുക്ത മേൽശാന്തി സുബ്രഹ്മണ്യൻ ശങ്കരൻ നമ്പൂതിരിയെയും മാളികപ്പുറം മേൽശാന്തി എ.ദാമോദരൻ നമ്പൂതിരിയെയും സോപാനത്തേക്ക് ആനയിക്കും. സുബ്രഹ്മണ്യൻ ശങ്കരൻ നമ്പൂതിരിയെ തന്ത്രി ശ്രീകോവിലിനുള്ളിലേക്ക് കൊണ്ടുപോയി അയ്യപ്പവിഗ്രഹത്തിനു സമീപമിരുത്തി കാതിൽ മൂലമന്ത്രം ചൊല്ലിക്കൊടുക്കും. തുടർന്ന് ദാമോദരൻ നമ്പൂതിരിയെ മാളികപ്പുറം മേൽശാന്തിയായും അവരോധിക്കുകയും ചെയ്യും.

17നു പുലർച്ചെ 3ന് പുതിയ മേൽശാന്തിമാരാണ് നടകൾ തുറക്കുക. തങ്കഅങ്കി ചാർത്തി ഡിസംബർ 27നു മണ്ഡലപൂജയ്ക്കുശേഷം നട അടയ്ക്കും. 30നു വൈകുന്നേരം 5ന് മകരവിളക്ക് ഉത്സവത്തിനു നടതുറക്കും. ജനുവരി 14നാണ് മകരവിളക്ക്.