ഉത്തരേന്ത്യയില്‍ മാത്രം പറഞ്ഞ് കേട്ടിരുന്ന കൊടിയ ബാല പീഡനങ്ങളും ബലാത്സംഗങ്ങളും നമ്മുടെ കണ്‍മുമ്പില്‍ എത്തുകയാണ്. നിരന്തരമായാണ് കേരളത്തില്‍ പെണ്‍കുട്ടികള്‍ പീഡനത്തിനിരയാകുന്നത്. എല്ലാവരും പരിചയക്കാര്‍ ആയിരുന്നുവെന്നതാണ് ഏറെ വിരോധാഭാസം.

കൊട്ടിയൂരില്‍ അച്ചന്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചതു മുതലാണ് കാര്യങ്ങള്‍ പുറംലോകമറിഞ്ഞത്. തുടര്‍ന്ന് വാളയാറില്‍ പ്രായപൂര്‍ത്തിയാകാത്ത പെണ്‍കുട്ടികളെ പീഡിപ്പിച്ച് കൊലപ്പെടുത്തിയതും വാര്‍ത്തയായി. കോഴിക്കോട് യത്തീംഖാനയില്‍ 7 പെണ്‍കുട്ടികളെ പീഡിപ്പിച്ചതു പുറത്തായതിന് പിന്നാലെയാണ് ആലുവയില്‍ നിന്നുള്ള വാര്‍ത്ത വരുന്നത്.

ആലുവ ബിനാനിപുരത്ത് മൂന്നും ഏഴും വയസുള്ള പെണ്‍കുട്ടികളാണ് പീഡനത്തിനിരയായത്. സംഭവത്തില്‍ അയല്‍വാസിയെ പോലീസ് കസ്റ്റഡിയിലെടുത്തു. ഉണ്ണിയാണ് അറസ്റ്റിലായത്. അയല്‍ വീട്ടില്‍ കളിക്കാന്‍ പോയപ്പോള്‍ ഇയാള്‍ പീഡിപ്പിച്ചുവെന്നാണ് കുട്ടികള്‍ പറയുന്നത്. സ്‌കൂളില്‍ എത്തിയപ്പോള്‍ ശാരീരികാസ്വാസ്ഥ്യമനുഭവപ്പെട്ടതിനെ തുടര്‍ന്നാണ് കുട്ടികള്‍ കാര്യമറിയിച്ചത്. ഇയാളെ പോലീസ് ചോദ്യം ചെയ്തുവരികയാണ്. സംസ്ഥാനത്ത് ഒരാഴ്ചയ്ക്കിടെ റിപ്പോര്‍ട്ട് ചെയ്യുന്ന നാലാമത്തെ പീഡനക്കേസാണ് ആലുവയിലേത്. 

പ്രായപൂര്‍ത്തിയാകാത്ത കുട്ടികള്‍ ഇങ്ങനെ പീഡനത്തിനിരയാകുമ്പോള്‍ കേരളം മരവിച്ചു നില്ക്കുന്നു. നമ്മുടെ കുട്ടികളെ സംരക്ഷിക്കാനാകാത്ത പോലീസിനെതിരെ ജനങ്ങള്‍ സംസാരിച്ചു തുടങ്ങി. ഇനിയാരോട് പരാതിപ്പെടാന്‍ സ്വന്തം വീട്ടില്‍ പോലും കുട്ടികള്‍ സുരക്ഷിതരല്ല.