ഇ.പി.ജയരാജന്‍ പദവി ദുരുപയോഗം ചെയ്താണ് ബന്ധുക്കളെ സഹായിച്ചതെന്ന വിജിലന്‍സ് റിപ്പോര്‍ട്ട് പിണറായിയുടെ അറിവോടെയാണെന്നു സൂചന. റിപ്പോര്‍ട്ട് ഹൈക്കോടതിയില്‍ നല്‍കന്നതിനു മുമ്പ് ജേക്കബ് തോമസും പിണറായിയും ആശയ വിനിമയം നടത്തിയിരുന്നതായി വിശ്വസ്ത കേന്ദ്രങ്ങളില്‍ നിന്നറിയുന്നു.

പി.കെ.ശ്രീമതിയുടെ മകനെ കേരള ഇന്‍ഡസ്ട്രിയല്‍ എന്റര്‍പ്രൈസസില്‍ നിയമിച്ചതിനെതിരെയാണ് വിജിലന്‍സ് ഗുരുതര ക്രമക്കേട് കാണുന്നത്. വിജിലന്‍സ് കേസ് റദ്ദാക്കണമെന്ന ശ്രീമതിയുടെ മകന്റെ ഹര്‍ജി പരിഗണിക്കമ്പോഴാണ് ജയരാജനെതിരെ വിജിലന്‍സ് പറഞ്ഞത്.അഴിമതി നിരോധന നിയമപ്രകാരമുള്ള അനധികൃത നേട്ടത്തില്‍ ഇതും ഉള്‍പ്പെടുമെന്നാണ് വിജിലന്‍സിന്റെ വാദം. ഇറക്കിയ ഉത്തരവ് ദിവസങ്ങള്‍ക്കകം പിന്‍വലിച്ചത് ഇതിനു ഉദാഹരണമാണെന്നും വിജിലന്‍സ് പറയുന്നു.

സി പി എം കണ്ണൂര്‍ ലോബി രണ്ടായി തിരിയുന്നതിന്റെ വ്യക്തമായ സൂചനയാണ് പുതിയ സംഭവ വികാസം. ജയരാജനെതിരെ എഫ്.ഐ..ആര്‍ രജിസ്റ്റര്‍ ചെയ്യുമെന്ന വ്യക്തമായ സൂചനയും വിജിലന്‍സ് നല്‍കിയിട്ടുണ്ട്. കേസില്‍ ഇ.പിക്ക് പുറമേ ശ്രീമതിയും പിണറായിയുടെ എതിര്‍പക്ഷത്താണ്. എന്നാല്‍ കോടിയേരി പിണറായിക്ക് ഒപ്പമാണെന്ന സൂചനയും ലഭിക്കുന്നു. കോടിയേരിയുടെ അറിവും സമ്മതവും ഇല്ലാതെയായിരുന്നത്രേ നിയമനം.കോടിയേരിയുടെ മകന്‍ പൊതുമേഖലാ സ്ഥാപന മേധാവികളുടെ നിയമനത്തില്‍ ഇടപെട്ടെന്നും മന്ത്രിയായിരിക്കെ ഇ.പി.അത് കേട്ടില്ലെന്നും റിപ്പോര്‍ട്ടുകളുണ്ട്.ഇത് കോടിയേരിയെ ചൊടിപ്പിച്ചിരുന്നത്രേ.

കോടിയേരിയുടെ പിന്തുണയില്ലാതെ പിണറായി ഇത്തരത്തില്‍ പ്രവര്‍ത്തിക്കാന്‍ സാധ്യതയില്ലെന്ന നിഗമനവും പാര്‍ട്ടിയുടെ കണ്ണൂര്‍ ലോബിക്കുണ്ട്. എം.വി.ജയരാജനെ പ്രൈവറ്റ് സെക്രട്ടറി യാക്കിയത് ഇ.പി.വിഭാഗത്തെ ഒറ്റപ്പെടുത്താനാണെന്നും സൂചനയുണ്ട്. ഇ പി യെ പോലെ സമുന്നതനായ ഒരു നേതാവിനെതിരെ ഹൈക്കോടതിയില്‍ നല്‍കുന്ന റിപ്പോര്‍ട്ട് മുഖ്യമന്ത്രിയോട് ചര്‍ച്ച ചെയ്തിട്ടില്ലെന്ന് കരുതാന്‍ വയ്യ.